મુલુંડ સ્થિત એમ. ટી. અગ્રવાલ હૉસ્પિટલમાં હાલમાં ત્રણ બાળકો સહિત ૨૮ લોકો સારવાર લઈ રહ્યા છે. હૉસ્પિટલના મૅડિકલ સુપરિન્ટેન્ડેન્ટ ડૉ. રાજુ સિંહ રાઠોડે જણાવ્યું હતું કે તમામ દર્દીઓને તાત્કાલિક તબીબી સારવાર આપવામાં આવી હતી અને હાલ તેમની સ્થિતિ સ્થિર છે.
પ્રતીકાત્મક ફાઇલ તસવીર
મુંબઈના ભાંડુપમાં એક લગ્નમાં ભોજન કર્યા બાદ ઓછામાં ઓછા ૪૫ લોકો બીમાર પડ્યા છે. પીડિતોમાં નવદંપતીનો પણ સમાવેશ છે. આ ઘટના શનિવાર, પહેલી નવેમ્બરની રાત્રે બની હતી. મહેમાનોને ઉલટી અને ઝાડાની ફરિયાદ થતાં તેમને મુંબઈની વિવિધ હૉસ્પિટલોમાં દાખલ કરવામાં આવ્યા હતા. પ્રાથમિક માહિતી મુજબ, કાર્યક્રમમાં પીરસવામાં આવેલી `કલાકંદ` (દૂધમાંથી બનેલી મીઠાઈ) ખાધા પછી લોકો બીમાર પડ્યા હોવાનું જણાય છે; જોકે, બીમારીનું ચોક્કસ કારણ હજી સુધી સ્પષ્ટ થયું નથી.
આ કાર્યક્રમ નાહુર વેસ્ટના એક હૉલમાં યોજાયો હતો.
ADVERTISEMENT
લગ્ન સમારંભ નાહુર વેસ્ટ સ્થિત `મહાબોધિ રત્ન વિહાર હૉલ`માં યોજાયો હતો, જેમાં આશરે ૪૦૦ થી ૫૦૦ મહેમાનો હાજર હતા. શરૂઆતી અહેવાલો અનુસાર, વર-કન્યા સહિત ૪૦ થી ૫૦ લોકોને ઉલટી અને ઝાડાની સમસ્યા થઈ હતી. એવું પણ જાણવા મળ્યું છે કે કેટલાક મહેમાનોને કાર્યક્રમ પૂરો થયા બાદ ઘરે પહોંચ્યા પછી અસ્વસ્થતા અનુભવવા લાગી હતી.
૨૮ દર્દીઓને એમ. ટી. અગ્રવાલ હૉસ્પિટલમાં દાખલ કરવામાં આવ્યા
મુલુંડ સ્થિત એમ. ટી. અગ્રવાલ હૉસ્પિટલમાં હાલમાં ત્રણ બાળકો સહિત ૨૮ લોકો સારવાર લઈ રહ્યા છે. હૉસ્પિટલના મૅડિકલ સુપરિન્ટેન્ડેન્ટ ડૉ. રાજુ સિંહ રાઠોડે જણાવ્યું હતું કે તમામ દર્દીઓને તાત્કાલિક તબીબી સારવાર આપવામાં આવી હતી અને હાલ તેમની સ્થિતિ સ્થિર છે. દર્દીઓ રાત્રે લગભગ ૧૧:૪૦ વાગ્યે હૉસ્પિટલ પહોંચ્યા હતા. લગ્નમાં કેટલાક મહેમાનોને `કલાકંદ` પીરસવામાં આવ્યું હતું, અને એવી શંકા છે કે આ મીઠાઈ ખાવાથી જ તેમને આ તકલીફ થઈ છે. ચાર બાળકોને મુલુંડની કામગાર હૉસ્પિટલમાં, એક વ્યક્તિને વિક્રોલીની હૉસ્પિટલમાં અને પાંચ વ્યક્તિઓને રાજાવાડી હૉસ્પિટલમાં દાખલ કરવામાં આવ્યા હતા. રાજાવાડી હૉસ્પિટલમાં રાતે પાંચ લોકો હૉસ્પિટલમાં આવ્યા હતા, પરંતુ તેઓ ડૉક્ટરની સલાહ વિરુદ્ધ હૉસ્પિટલમાંથી જતા રહ્યા હતા. કૅટરર સામે કેસ નોંધવામાં આવ્યો છે. વરરાજાના એક સંબંધીએ આક્ષેપ કર્યો છે કે લગ્નમાંથી પરત ફર્યાના થોડા સમય બાદ જ મહેમાનો બીમાર પડવા લાગ્યા હતા. શરૂઆતમાં કેટલીક મહિલાઓને ઉલટી થવાની સમસ્યા થઈ હતી અને ત્યારબાદ અન્ય ૩૦ થી ૪૦ વ્યક્તિઓમાં પણ આવા જ લક્ષણો જોવા મળ્યા હતા. ખોરાકની ગુણવત્તા પર સવાલ ઉઠાવતા, સ્વજનોએ આ માટે કૅટરિંગ સ્ટાફને જવાબદાર ઠેરવ્યો છે. તેમણે મહારાષ્ટ્ર ફૂડ એન્ડ ડ્રગ ઍડમિનિસ્ટ્રેશન (FDA) ના કમિશનર તુકારામ મુંઢે અને મુંબઈ પોલીસ પાસે આ મામલે તપાસની માગ કરી છે.
ભાંડુપ પોલીસે આ ઘટના અંગે FDAને જાણ કરી
ખોરાકના સૅમ્પલ્સ લઈ લેવામાં આવ્યા છે અને ટેસ્ટ રિઝલ્ટની રાહ જોવાઈ રહી છે. ભાંડુપ પોલીસ સ્ટેશનમાં `કલશ કૅટરર્સ`ના માલિક મુલસિંહ હરિસિંહ રાજપુરોહિત અને અન્ય સંડોવાયેલા પક્ષો વિરુદ્ધ કેસ નોંધવામાં આવ્યો છે. રિપોર્ટ આવ્યા પછી બીમારીનું કારણ સ્પષ્ટ થશે અને તે મુજબ આગળની કાયદેસરની કાર્યવાહી કરવામાં આવશે.
