India Women Team refuse Asia Cup 2026 trophy: એશિયા કપની ફાઇનલમાં શ્રીલંકાને હરાવ્યા બાદ ભારતીય મહિલા ક્રિકેટ ટીમે મોહસીન નકવી પાસેથી ટ્રોફી સ્વીકારવાનો ઇનકાર કરતા સર્જાયો ડ્રામા; પ્રેઝન્ટેશન સમારોહમાં પણ થયો વિલંબ; આખરે BCCI સચિવે સ્પષ્ટ કર્યું કારણ
મોહસિન નકવીના હાથે ટ્રોફી ન સ્વીકારી ભારતીય મહિલા ટીમે!
રવિવારે દુબઈ ઇન્ટરનેશનલ ક્રિકેટ સ્ટેડિયમ (Dubai International Cricket Stadium) ખાતે રમાયેલી વુમન્સ એશિયા કપ ફાઇનલમાં શ્રીલંકા (Sri Lanka women’s team) સામે ૭૨ રને શાનદાર વિજય મેળવ્યા બાદ ભારતીય મહિલા ક્રિકેટ ટીમે (Indian women’s cricket team) વુમન્સ એશિયા કપની (Asia Cup 2026) ટ્રોફી સ્વીકારવાનો ઇનકાર કરી દીધો હતો. એશિયન ક્રિકેટ કાઉન્સિલ (Asia Cricket Council) ના પ્રમુખ અને પાકિસ્તાન ક્રિકેટ બોર્ડ (Pakistan Cricket Board) ના ચેરમેન મોહસિન નકવી (Mohsin Naqvi)ના હસ્તે ટ્રોફી લેવાનો ઇનકાર કરીને કેપ્ટન હરમનપ્રીત કૌર (Harmanpreet Kaur) અને તેમની ટીમ ડ્રેસિંગ રૂમની અંદર જ રહી હતી. પુરુષ એશિયા કપ ફાઇનલ જેવી જ સ્થિતિનું અહીં પુનરાવર્તન થતાં કૂટનીતિક અને વહીવટી સ્તરે મડાગાંઠ વધુ ઘેરી બની છે.
સમજૂતીના પ્રયાસો નિષ્ફળ જતાં એવોર્ડ સમારોહમાં વિલંબ થયો
ADVERTISEMENT
મેચ પછીનો પ્રેઝન્ટેશન સમારોહ લગભગ ૫૦ મિનિટ સુધી વિલંબિત થયો હતો કારણ કે અધિકારીઓ પડદા પાછળ વાટાઘાટો કરી રહ્યા હતા. બોર્ડ ઓફ કન્ટ્રોલ ફોર ક્રિકેટ ઇન ઇન્ડિયા (Board of Control for Cricket in India) ના સચિવ દેવજીત સૈકિયા (Devajit Saikia)એ પુષ્ટિ કરી હતી કે ભારતીય બોર્ડે વૈકલ્પિક વ્યવસ્થાનો પ્રસ્તાવ મૂક્યો હતો.
બીસીસીઆઈ (BCCI)એ પ્રસ્તાવ મૂક્યો હતો કે, એસીસી (ACC)ના ડેપ્યુટી ચેરમેન ખાલીદ અલ ઝરૂ (Khalid Al Zarooni)ની ટ્રોફી એનાયત કરે અથવા વિજેતા દેશના બોર્ડના કોઈ પ્રતિનિધિ ટ્રોફી સોંપે. જોકે, નકવીએ આ વિકલ્પોનો અસ્વીકાર કર્યો હતો, અને ભારતીય ટીમે એસીસી વડા પાસેથી ટ્રોફી સ્વીકારવાનો ઇનકાર (India Women Team refuse Asia Cup 2026 trophy) બરકરાર રાખ્યો હતો, જેના પરિણામે વિજેતા ટીમના સમારોહ વિના જ પ્રોગ્રામ પૂરો થયો હતો.
એકતા અને એકજૂથતા દર્શાવવા બીસીસીઆઈ દ્વારા નિર્ણય લેવાયો
બોર્ડના આ વલણની સ્પષ્ટતા કરતા સૈકિયાએ જણાવ્યું હતું કે, પુરુષ ટીમની સ્થિતિ સાથે એકજૂથતા દર્શાવવા માટે આ નિર્ણય લેવામાં આવ્યો હતો. તેમણે નોંધ્યું હતું કે સરહદ પારના લશ્કરી સંઘર્ષો અને રાજદ્વારી તણાવના કારણે ભારતીય ટીમો પાકિસ્તાનના વરિષ્ઠ રાજકીય અગ્રણીઓ પાસેથી ટ્રોફી સ્વીકારશે નહીં. નોંધનીય છે કે મોહસિન નકવી પાકિસ્તાનના ગૃહમંત્રી તરીકે પણ સેવા આપે છે.
સૈકિયાએ સ્પષ્ટ કર્યું હતું કે સરકારી નીતિ મલ્ટી-ટીમ ઇવેન્ટ્સમાં તમામ દેશો સામે રમવાની મંજૂરી આપે છે, પરંતુ ચોક્કસ અધિકારીઓ પાસેથી પુરસ્કારો સ્વીકારવા પર મનાઈ છે. મુખ્ય કોચ અમોલ મજુમદારે મેચ પછીની પ્રેસ કોન્ફરન્સ દરમિયાન આ વાતોને સમર્થન આપતાં જણાવ્યું હતું કે સ્ક્વોડે બીસીસીઆઈ દ્વારા લેવાયેલા નિર્ણયને સંપૂર્ણ સમર્થન આપ્યું છે અને તેઓ ચેમ્પિયન તરીકે પોતાના પ્રવાસને સફળ માને છે.
શાનદાર પ્રદર્શન સાથે ભારતે આઠમી વાર ટાઇટલ જીત્યું
મેદાન પર, ભારતે શ્રીલંકા સામે શાનદાર પ્રદર્શન કરીને રેકોર્ડ આઠમું વુમન્સ એશિયા કપ ટાઇટલ પોતાના નામે કર્યું હતું. ઓપનિંગ બેટ્સમેન શેફાલી વર્મા (૬૮) અને વાઇસ કેપ્ટન સ્મૃતિ મંધાના (૫૯) એ ૧૨.૫ ઓવરમાં ૧૨૯ રનની ભાગીદારી કરીને ભારતને ૨૦ ઓવરમાં ૧૮૩/૫ ના સ્કોર સુધી પહોંચાડ્યું હતું.
જવાબમાં, શ્રીલંકાની ટીમ ૨૦ ઓવરમાં ૧૧૧ રનમાં ઓલઆઉટ થઈ ગઈ હતી, જેમાં શ્રી ચરણીએ બોલિંગમાં અદ્ભુત પ્રદર્શન કર્યું હતું. બ્રોડકાસ્ટ પૂરું થાય તે પહેલાં નકવીએ શ્રીલંકાના કેપ્ટન ચમારી અટાપટ્ટુને રનર્સ-અપનો ચેક એનાયત કર્યો હતો. ભારતીય સ્ક્વોડ હવે પછી યોજાનારી એશિયન ગેમ્સ માટે જાપાનનો પ્રવાસ કરવાની તૈયારીમાં છે.
