અબુ ધાબીમાં રમાઈ રહેલી એકમાત્ર ટેસ્ટ-મૅચમાં બંગલાદેશે અફઘાનિસ્તાન સામે ૪૭૯ રનનો વિશાળ ટાર્ગેટ મૂક્યો છે.
અબુ ધાબીમાં રમાઈ રહેલી એકમાત્ર ટેસ્ટ-મૅચ
અબુ ધાબીમાં રમાઈ રહેલી એકમાત્ર ટેસ્ટ-મૅચમાં બંગલાદેશે અફઘાનિસ્તાન સામે ૪૭૯ રનનો વિશાળ ટાર્ગેટ મૂક્યો છે. પહેલી ઇનિંગ્સમાં ૩૪૬ રનનો સ્કોર કરનાર બંગલાદેશે બીજી ઇનિંગ્સમાં ૧૦૫.૨ ઓવરમાં ૩૭૨-૭ના સ્કોર પર બીજી ઇનિંગ્સ ડિક્લેર કરી હતી. પહેલી ઇનિંગ્સમાં ૨૪૦ રન કરનાર અફઘાનિસ્તાન ટીમ ચોથા દિવસના અંતે ૫૦ ઓવરમાં ૧૩૨-૩નો સ્કોર કરી શક્યું હતું. આજે અફઘાનિસ્તાનને જીત માટે ૩૪૭ રનની જરૂર છે અને ૭ વિકેટ હાથમાં છે.
ગઈ કાલે બંગલાદેશે ૭૩મી ઓવરમાં ૨૨૩-૬ના સ્કોરથી બીજી ઇનિંગ્સને આગળ વધારી હતી. લિટન દાસે ૧૧૭ બૉલમાં ૧૪ ફોરની મદદથી ૧૦૨ રન અને મેહદી હસન મિરાજે ૯૭ બૉલમાં અણનમ ૫૨ રન કર્યા હતા. અફઘાનિસ્તાન માટે ફાસ્ટ બોલર્સ યામીન અહમદઝાઈ, મોહમ્મદ સલીમ સફી સહિત સ્પિનર ઝિયા-ઉર-રહમાન અકબરે ૨-૨ વિકેટ લીધી હતી.
ADVERTISEMENT
ટાર્ગેટ-ચેઝ દરમ્યાન બીજી ઇનિંગ્સમાં અફઘાનિસ્તાને ૬.૩ ઓવરમાં ૨૮ રનના સ્કોર પર બે વિકેટ ગુમાવી દીધી હતી. પહેલી ઇનિંગ્સના શતકવીર કૅપ્ટન રહમત શાહે ૧૨૪ બૉલમાં પાંચ ફોર, એક સિક્સની મદદથી ૫૧ રનનું યોગદાન આપ્યું હતું. બંગલાદેશના ફાસ્ટ બોલર્સ ઇબાદત હુસેને બે વિકેટ અને હસન મહમૂદે એક વિકેટ લીધી હતી.
