મૈંને તેરે હી ભરોસે હનુમાન, સાગર મેં નૈયા ડાર દઈના ગાયક પર હનુમંતકૃપા
સુનીલે ૪ નવેમ્બરે સોશ્યલ મીડિયા પ્લૅટફૉર્મ ઇન્સ્ટાગ્રામ પર તસવીરો અને વિડિયો શૅર કરીને એક ભાવનાત્મક પોસ્ટમાં ભગવાનને તેની દૃષ્ટિ પાછી આવે એવી પ્રાર્થના કરી હતી
રેકૉર્ડબ્રેક ફિલ્મ ‘હનુમાન અંશ’ના ફેમસ ગીત ‘મૈંને તેરે હી ભરોસે હનુમાન, સાગર મેં નૈયા ડાર દઈ’નો સિંગર સુનીલ લોધી બાળપણથી જ જોઈ શકતો નથી; પણ હવે તેના જીવનમાં એક નવી આશા જાગી છે, કારણ કે તેની આંખની સારવાર શરૂ થઈ ગઈ છે.
સુનીલે ૪ નવેમ્બરે સોશ્યલ મીડિયા પ્લૅટફૉર્મ ઇન્સ્ટાગ્રામ પર તસવીરો અને વિડિયો શૅર કરીને એક ભાવનાત્મક પોસ્ટમાં ભગવાનને તેની દૃષ્ટિ પાછી આવે એવી પ્રાર્થના કરી હતી. તેણે તેના ચાહકોના આશીર્વાદ માગ્યા હતા કે તેની આંખોની દૃષ્ટિ પાછી આવે. તેણે લખ્યું હતું કે ‘ચાહકોની પ્રાર્થનાથી એક નવી આશા જાગી છે. હું ભગવાનને પ્રાર્થના કરું છું કે મારા જીવનમાં પ્રકાશ આવે અને હું મારી પોતાની આંખોથી આ સુંદર દુનિયાને જોઈ શકું.’
ADVERTISEMENT
માતા-પિતાની વર્ષોની રાહ પૂરી થાય એવી પ્રાર્થના કરતાં સુનીલે કહ્યું હતું કે લોકોનો પ્રેમ અને આશીર્વાદ મારી સૌથી મોટી તાકાત છે.
પડકારજનક બાળપણ : ટ્રેનોમાં તાનપૂરો વગાડતો
મધ્ય પ્રદેશના બુંદેલખંડ પ્રદેશના રહેવાસી સુનીલ લોધીનું બાળપણ ખૂબ જ પડકારજનક રહ્યું હતું. દસથી ૧૧ વર્ષની ઉંમરે તેણે તાનપૂરો વગાડવાનું અને સ્થાનિક ટ્રેનો અને ગામડાંઓમાં બુંદેલી લોકગીતો અને ભજનો ગાવાનું શરૂ કર્યું હતું. તેના બુંદેલી ભજન ‘મોરે સંકટ કે કટૈયા’ને યુટ્યુબ અને ઇન્સ્ટાગ્રામ પેજ ‘બુંદેલી દુનિયા’ પર ૨.૯ કરોડથી વધુ વ્યુઝ મળ્યા હતા. ત્યાર બાદ ફિલ્મનિર્માતા પંકજે સુનીલનો અવાજ સાંભળ્યો હતો. પંકજે તેને ફિલ્મ ‘હનુમાન અંશ’ના ‘મૈંને તેરે હી ભરોસે’ ગીત માટે પસંદ કર્યો અને બાદમાં સુનીલ દેશભરમાં રાતોરાત સેન્સેશન બની ગયો હતો.
