સૂર્યકુમાર યાદવની કૅપ્ટન્સીમાં ભારતીય ટીમ આજથી સાઉથ આફ્રિકા સામે તેમની ધરતી પર ચાર મૅચની T20 સિરીઝ રમશે
બન્ને ટીમના કૅપ્ટન્સે ટ્રોફી સાથે પારંપરિક અંદાજમાં કરાવ્યું ફોટોશૂટ
મેન્સ T20 વર્લ્ડ કપ 2024ની ફાઇનલની રસાકસીની ટક્કર બાદ સાઉથ આફ્રિકા અને ભારતીય ટીમ વચ્ચે આજથી ફરી એક વાર T20નો જંગ જામશે. સૂર્યકુમાર યાદવની કૅપ્ટન્સીમાં ભારતીય ટીમ આજથી સાઉથ આફ્રિકા સામે તેમની ધરતી પર ચાર મૅચની T20 સિરીઝ રમશે. સંજુ સૅમસન અને અભિષેક શર્મા પાસે આ સિરીઝથી ભારતીય ટીમના ટૉપ ઑર્ડરમાં સ્થાન મજબૂત કરવાની તક રહેશે. સાથે જ યશ દયાલ, રમણદીપ સિંહ અને વિજયકુમાર વ્યશકને ઇન્ટરનૅશનલ ડેબ્યુની તક મળશે કે નહીં એના પર સૌની નજર રહેશે. જૂન ૨૦૨૪માં T20 વર્લ્ડ કપ ફાઇનલમાં ટકરાયા બાદ ચૅમ્પિયન ભારત અને રનર-અપ સાઉથ આફ્રિકા વચ્ચે આજે પહેલી ટક્કર થશે.
ડિસેમ્બર ૨૦૨૩માં ભારતીય ટીમ સૂર્યકુમાર યાદવની કૅપ્ટન્સીમાં ત્રણ મૅચની T20 સિરીઝ રમવા સાઉથ આફ્રિકા ગઈ હતી પણ એ સિરીઝ ૧-૧થી ડ્રૉ રહી હતી. આજની મૅચ ભારતીય સમય અનુસાર સાંજે ૮.૩૦ વાગ્યે શરૂ થશે. ક્રિકેટ-ફૅન્સ જિયો સિનેમા અને સ્પોર્ટ્સ 18ની ચૅનલ પર આ મૅચનો આનંદ માણી શકશે.
