165 વિકેટ સાથે ન્યુ ઝીલૅન્ડનો હાઇએસ્ટ T20 વિકેટ ટેકર બોલર બન્યો ભારતીય મૂળનો સ્પિનર ઈશ સોઢી.
બંગલાદેશનો તૌહીદ હૃદોય મૅન ઑફ ધ સિરીઝ રહ્યો હતો, T20 સિરીઝ ડ્રૉ થયા બાદ ટ્રોફી સાથે ન્યુ ઝીલૅન્ડનો સ્ટૅન્ડ-ઇન-કૅપ્ટન નિક કેલી અને બંગલાદેશનો કૅપ્ટન લિટન દાસ.
ગઈ કાલે યજમાન બંગલાદેશ સામે ત્રીજી T20 મૅચ ૬ વિકેટે જીતીને ન્યુ ઝીલૅન્ડે સિરીઝ ૧-૧થી ડ્રૉ કરી હતી. મીરપુરમાં વરસાદથી પ્રભાવિત આ મૅચ ૧૫-૧૫ ઓવરની થઈ હતી. બંગલાદેશની ટીમ ૧૪.૨ ઓવરમાં ૧૦૨ રનના સ્કોર પર ઑલઆઉટ થઈ હતી. ન્યુ ઝીલૅન્ડે ૧૧.૪ ઓવરમાં ૪ વિકેટે ૧૦૪ રન કરીને જીત નોંધાવી હતી.
સિરીઝની પહેલી મૅચ બંગલાદેશે ૧૮૩ રનનો ટાર્ગેટ ચેઝ કરીને ૬ વિકેટે જીતી હતી. ૨૯ એપ્રિલે વરસાદને કારણે બીજી મૅચ રદ રહી હતી. અગાઉ બન્ને ટીમની ૨૦૨૩ની ત્રણ મૅચની સિરીઝ પણ ૧-૧થી ડ્રૉ રહી હતી. એ સમયે પણ બીજી મૅચ વરસાદને કારણે રદ થઈ હતી. ૨૦૨૩ પહેલાં બંગલાદેશ સામેની ત્રણ સિરીઝમાંથી બે સિરીઝ ન્યુ ઝીલૅન્ડ જીત્યું હતું.
