ગ્રાહકો સરળતાથી પ્રોડક્ટની ઓળખ કરી શકે એ માટે લીલા અને લાલ રંગના ડૉટ દર્શાવવા પડશે
પ્રતીકાત્મક તસવીર
સાબુ અને શૅમ્પૂથી લઈને ટૂથપેસ્ટ અને અન્ય કૉસ્મેટિક્સ જેવી પ્રોડક્ટ્સ કઈ સામગ્રીમાંથી બની છે એ હવે ગ્રાહકો સરળતાથી ઓળખી શકશે. કેન્દ્ર સરકારે પૅકેજિંગ નિયમોમાં મોટો ફેરફાર કરીને તમામ સૌંદર્ય અને પર્સનલ કૅર પ્રોડક્ટ્સ પર શાકાહારી અને માંસાહારી પ્રતીક (સિમ્બૉલ) દર્શાવવાનું ફરજિયાત બનાવ્યું છે. ગ્રાહકોને ખરીદી કરતી વખતે પ્રોડક્ટની અસલિયત ઝડપથી સમજાય એ માટે આ નિયમ લાવવામાં આવ્યો છે.
કેન્દ્ર સરકારે લીગલ મેટ્રોલૉજી (પૅક્ડ કૉમોડિટીઝ) રૂલ્સ ૨૦૧૧માં સુધારો કરીને આ લેબલિંગ નિયમ લાગુ કર્યો છે જે સોમવારથી અમલમાં આવી ગયો છે. નવા નિયમ મુજબ શાકાહારી પ્રોડક્ટ્સ પર લીલા રંગનું ટપકું (ગ્રીન ડૉટ) અને માંસાહારી પ્રોડક્ટ્સ પર લાલ અથવા કથ્થઈ રંગનું ટપકું (રેડ કે બ્રાઉન ડૉટ) લગાડવું પડશે.
આ સિમ્બૉલ પૅકેજિંગના મુખ્ય ડિસ્પ્લે પૅનલની ટોચ પર જ સ્પષ્ટ દેખાય એ રીતે છાપવાનું રહેશે. આ નિર્ણયથી ગ્રાહકો પોતાની પસંદગી મુજબ વેજ કે નૉનવેજ પ્રોડક્ટ્સની ખરીદી સહેલાઈથી કરી શકશે.
