બાબા સિદ્દીકી મર્ડર કેસના વૉન્ટેડ આરોપી ઝીશાન અખ્તરે વિડિયો બહાર પાડીને દાવો કર્યો કે...
ઝીશાન અખ્તર
બાંદરાના ભૂતપૂર્વ વિધાનસભ્ય બાબા સિદ્દીકી હત્યાકેસના વૉન્ટેડ આરોપી ઝીશાન અખ્તરે એક વિડિયો વાઇરલ કર્યો છે જેમાં તેણે કહ્યું હતું કે ‘મને આ કેસમાં ખોટી રીતે સંડોવી દેવાયો છે. ભારતથી ભાગી જવામાં મને પાકિસ્તાનના ગૅન્ગસ્ટર શેહઝાદ ભાટીએ મદદ કરી હતી. અમને જ્યારે પણ મોકો મળશે ત્યારે સામેવાળાને ઠોકતા રહીશું.’
વાઇરલ થયેલી એ વિડિયો-ક્લિપમાં હૂડી પહેરેલા ઝીશાને કહ્યું હતું કે ‘અત્યારે હું એશિયાથી બહુ જ દૂર છું અને મને શેહઝાદ ભાટીએ જ આશરો પણ આપ્યો છે. તે અમારા મોટા ભાઈ જેવા છે. અમને કોઈ પણ તકલીફ હોય તો શેહઝાદ અમારી સાથે ઊભા રહીને અમને સાથ આપે છે. તપાસ કરશે તો ભારતવાળાને ખબર પડી જ જશે કે હું ક્યાં છું. મારા દુશ્મનોને હું ચેતવવા માગું છું કે હું અહીંથી નીકળ્યા પછી તેમને જોઈ લઈશ.’
ADVERTISEMENT
શેહઝાદ ભાટી સોશ્યલ મીડિયા પર અવારનવાર શસ્ત્રો સાથેના ધમકીભર્યા વિડિયો પોસ્ટ કરતો રહે છે. જોકે તેના પર પાકિસ્તાનમાં પણ અન્ડરવર્લ્ડ સાથેના કનેક્શનને લીધે બૅન મૂકવામાં આવ્યો છે.
ઝીશાન અખ્તરના આ વિડિયોને લઈને મુંબઈ પોલીસનો સાઇબર સેલ ઍક્ટિવ થઈ ગયો છે અને વિડિયોમાં જે દેખાય છે તે ઝીશાન જ છે અને તેણે જે દાવા કર્યા છે એ સાચા છે કે કેમ એની ખાતરી કરવા તપાસનાં ચક્રો ગતિમાન કર્યાં છે.
