આજે પણ હીટવેવની આગાહી, નવરાત્રિમાં ઠંડક નહીં થાય
પ્રતીકાત્મક તસવીર
મુંબઈમાં હીટવેવની સ્થિતિ યથાવત્ રહેવાની સાથે ૨૪ કલાકમાં મહત્તમ તાપમાનમાં બે ડિગ્રીનો વધારો થયો છે. સોમવારે સાંતાક્રુઝ વેધશાળાએ ૩૮.૨ ડિગ્રી મહત્તમ તાપમાન નોંધ્યું હતું, જે સામાન્ય કરતાં ૫.૧ ડિગ્રી વધારે હતું. આ અગાઉ ૨૦૧૫ના ઑક્ટોબર મહિનામાં ૩૮.૬ ડિગ્રી તાપમાન નોંધાયું હતું.
ભારતીય હવામાન વિભાગ દ્વારા સોમવારે ગરમ અને ભેજવાળા વાતાવરણ માટે યલો અલર્ટ જાહેર કરવામાં આવી હતી, જેને બપોરે હીટવેવની ચેતવણીમાં અપગ્રેડ કરવામાં આવી હતી. મુંબઈના હવામાન વિભાગના ડિરેક્ટર વિક્રમ સિંહે જણાવ્યું હતું કે ‘મંગળવારે પણ હીટવેવ જેવી સ્થિતિ ચાલુ રહેશે અને ત્યાર બાદ ગરમ તથા ભેજવાળું વાતાવરણ રહેશે. જોકે થોડા દિવસો પછી આંશિક રાહતની અપેક્ષા છે, પરંતુ આ અઠવાડિયે મહત્તમ તાપમાન ૩૫ ડિગ્રીની ઉપર રહેશે. તાપમાનનો આધાર પવનની ગતિ અને દિશા પર રહેશે.’
ADVERTISEMENT
મહારાષ્ટ્રમાં તાપમાનની સ્થિતિ
સોમવારે મુંબઈનું મહત્તમ તાપમાન મહારાષ્ટ્રમાં ત્રીજા ક્રમે સૌથી વધુ હતું. રત્નાગિરિમાં સૌથી વધુ ૩૯.૨ ડિગ્રી તાપમાન નોંધાયું હતું, જે સામાન્ય કરતાં ૭.૬ ડિગ્રી વધારે હતું. ત્યાર બાદ માલેગાવમાં ૩૮.૪ ડિગ્રી તાપમાન નોંધાયું હતું, જે સામાન્ય કરતાં ૫.૬ ડિગ્રી વધારે હતું. હવામાનની સ્થિતિમાં થયેલા વ્યાપક ફેરફારો અને એના પરિણામે સર્જાયેલી એક્સ્ટ્રીમ કન્ડિશન મુખ્યત્વે એલ નિન્યોની પરિસ્થિતિ સાથે સંકળાયેલી છે, જેને કારણે આ વર્ષે વરસાદની પણ અછત સર્જાઈ છે.
