અમેરિકા અને ઈરાનના યુદ્ધને કારણે વાળ કપાવવા અને દાઢી કરાવવા માટે હવે વધારે પૈસા આપવા પડશે: શેવિંગ અને હેર-કટના ચાર્જમાં ૨૦ ટકાનો વધારો, નવો ભાવ અનુક્રમે ૧૨૦ અને ૧૮૦ રૂપિયા
પ્રતીકાત્મક તસવીર
ઈરાન અને અમેરિકા વચ્ચે ચાલતા યુદ્ધના કારણે ક્રૂડ ઑઇલના ભાવમાં વધારાના કારણે પેટ્રોલ-ડીઝલ તો મોંઘાં થયાં જ છે, પરંતુ હવે એની અસર સલૂન પર પણ થશે. મહારાષ્ટ્રના વાળંદ સમાજનું પ્રતિનિધિત્વ કરનારા નાગપુરના મહારાષ્ટ્ર નાભિક મહામંડળ દ્વારા વાળ કપાવવાના અને દાઢી કરવા બદલ વસૂલાતા ચાર્જમાં ૨૦ ટકાનો વધારો જાહેર કરવામાં આવ્યો છે. આ ભાવવધારો શનિવારથી લાગુ કરવામાં આવ્યો હતો જેને પગલે હેર-કટ માટે હવે ૧૮૦ રૂપિયા અને દાઢી કરવા માટે ૧૨૦ રૂપિયા ચૂકવવા પડશે. દાઢી ટ્રિમ કરાવવા માટે ૧૫૦ રૂપિયા, હેડ-મસાજ માટે ૧૮૦ રૂપિયા, હેર-વૉશ માટે ૧૨૦ રૂપિયા આપવાના રહેશે. ફેશ્યલ માટે પણ હવેથી ૭૦૦ રૂપિયા તથા હેર-સ્પા માટે ૬૦૦ રૂપિયા ચૂકવવા પડશે.
મહારાષ્ટ્ર નાભિક મહામંડળના શ્યામ આસ્કરકરે જણાવ્યું હતું કે ‘ઈરાન અને અમેરિકા વચ્ચે ચાલતા યુદ્ધના કારણે અમે જે વસ્તુઓનો ઉપયોગ સલૂનમાં કરીએ છીએ એનો ભાવ વધી ગયો છે તેમ જ અન્ય પ્રોડક્ટ્સ પણ મોંઘી થઈ ગઈ છે. સામાન્ય રીતે અમે બે વર્ષના સમયગાળા બાદ જાન્યુઆરી મહિનામાં અમારા ચાર્જમાં વધારો કરતા હોઈએ છીએ, પરંતુ સલૂનમાં વપરાતાં બધાં મટીરિયલ અને આઇટમ્સનો ભાવ વધી જતાં અમારે હાલ ચાર્જ વધારવો પડ્યો છે.
ADVERTISEMENT
મહારાષ્ટ્રનાં એક લાખ સલૂનમાં વધશે ચાર્જ
મહારાષ્ટ્રમાં એક લાખ કરતાં વધારે સલૂન છે અને એ બધાં જ ચાર્જ વધારશે એવો અંદાજ છે. જોકે મહારાષ્ટ્ર નાભિક મહામંડળ મહારાષ્ટ્રનાં લક્ઝરી-પ્રીમિયમ સૅલોંનું પ્રતિનિધિત્વ કરતું નથી એટલે એમાં આ ભાવવધારો લાગુ થશે કે નહીં એ કહી શકાય નહીં.
