વાયરલ વીડિયોમાં આ દીપડો એક રખડતા કૂતરા પાસે જતો દેખાય છે. ઈમારતની અંદર કૂતરો આરામ કરી રહ્યો હતો. કૂતરો જાગી જાય તે પહેલા જ દીપડો તેના પર હુમલો કરે છે. આ ઘટના સોશિયલ મીડિયા પર ઝડપથી વાયરલ થઈ ગઈ અને હવે લોકોમાં ચિંતા વધી ગઈ છે.
વાયરલ વીડિયોમાંથી સ્ક્રીન શૉટ (તસવીર: સોશિયલ મીડિયા)
મુંબઈના દિંડોશી વિસ્તારમાં ફરી એકવાર દીપડો દેખાતા રહેવાસીઓમાં ચિંતા ફેલાઈ ગઈ છે. 17 માર્ચ, 2026 ના રોજ વહેલી સવારે, રહેણાંક સોસાયટીમાં એક દીપડો CCTC કૅમેરામાં કેદ થયો હતો. આ ઘટના રાહેજા હાઇટ્સ કૉમ્પ્લેક્સમાં બની હોવાના અહેવાલ છે. અહીંના સીસીટીવી કૅમેરામાં પાર્કિંગ વિસ્તારમાં ફરતા દીપડાનો વીડિયો કેદ થયો હતો. વીડિયોને જોઈ લોકો ડરી ગયા છે અને મુંબઈમાં આવી ઘટનાઓ પણ સતત બની રહી છે, જેથી પ્રાણી પ્રેમીઓએ પણ તે અંગે નારાજગી વ્યક્ત કરી છે.
દીપડાનો વીડિયો CCTVમાં કેદ થયો
ADVERTISEMENT
સોશિયલ મીડિયા પ્લેટફોર્મ પર એક યુઝર દ્વારા શૅર કરાયેલા વીડિયોમાં, દીપડો સોસાયટી પરિસરમાં ફરતો જોઈ શકાય છે. એક રહેણાંક વિસ્તારમાં દીપડાની હાજરીએ હાલની સુરક્ષા વ્યવસ્થાની અસરકારકતા પર પ્રશ્નો ઉભા કર્યા છે.
#Mumbai- Leopard entered a Dindoshi housing society- Raheja Heights Complex a gated community with 675 flats, on the wee hours on March 17. The clip shows the leopard mauling a dog. pic.twitter.com/06QFXaUAOa
— Siraj Noorani (@sirajnoorani) March 18, 2026
કૂતરા પર હુમલો કર્યો
વાયરલ વીડિયોમાં આ દીપડો એક રખડતા કૂતરા પાસે જતો દેખાય છે. ઈમારતની અંદર કૂતરો આરામ કરી રહ્યો હતો. કૂતરો જાગી જાય તે પહેલા જ દીપડો તેના પર હુમલો કરે છે. આ ઘટના સોશિયલ મીડિયા પર ઝડપથી વાયરલ થઈ ગઈ અને હવે લોકોમાં ચિંતા વધી ગઈ છે.
મુલુંડમાં પણ કૂતરાને ઉપાડી જતો દીપડો દેખાયો હતો
મુલુંડ-વેસ્ટમાં મોડી રાતે આવેલા સાંઈપ્રસ્થ ખાતે સરદાર તારા સિંહ ગાર્ડન નજીક દીપડો દેખાવાની ઘટનાએ સ્થાનિક રહેવાસીઓને ચિંતામાં મૂકી દીધા છે. ગુરુવારે મોડી રાત્રે સંજય ગાંધી રાષ્ટ્રીય ઉદ્યાનમાંથી બહાર આવેલા દીપડાએ એક કૂતરાનો શિકાર કર્યો હતો અને આ સમગ્ર ઘટના ત્યાં લગાવવામાં આવેલા ક્લોઝ્ડ સર્કિટ ટેલિવિઝન (CCTV) કૅમેરામાં કેદ થઈ હતી. આ દૃશ્યો સામે આવતાં જ સમગ્ર વિસ્તારમાં ભયનું વાતાવરણ ફેલાઈ ગયું છે.
મુંબઈ ફૉરેસ્ટ-વિભાગના રેન્જ-ઑફિસર રામદાસ ભાંગરેએ ‘મિડ-ડે’ને કહ્યું હતું કે ‘સ્વપ્નનગરી વિસ્તારમાં આવેલા સાંઈપ્રસ્થમાં દીપડો આવ્યો હોવાની માહિતી મળતાં તાત્કાલિક અમારી ટીમ ઘટનાસ્થળે પહોંચી ગઈ હતી. દીપડો ક્યાંથી આવ્યો હતો અને કયા માર્ગે પાછો ગયો એની ચોક્કસ તપાસ કરવા માટે સ્થળ પર મેઝરમેન્ટ લેવામાં આવ્યું હતું. આ સાથે આસપાસના વિસ્તારોમાં જનજાગૃતિ અભિયાન પણ હાથ ધરવામાં આવ્યું હતું. લોકોને દીપડો દેખાય ત્યારે શું કરવું અને શું ન કરવું એની માહિતી આપીને રાતના સમયે એકલા બહાર ન નીકળવાની તેમ જ કોઈ શંકાસ્પદ હલચલ દેખાય તો તાત્કાલિક વનવિભાગના કન્ટ્રોલ-રૂમને જાણ કરવાની સૂચનાઓ આપવામાં આવી છે. CCTV કૅમેરામાં કેદ થયેલાં દૃશ્યો પરથી દીપડો હોવાની પુષ્ટિ થઈ છે. આ દીપડો અંદાજે ચારથી પાંચ વર્ષનો હોવાનું માનવામાં આવે છે. એ ખોરાકની શોધમાં આવ્યો હતો અને એનું નિશ્ચિત લક્ષ્ય હતું જે CCTV કૅમેરાના ફુટેજમાં સ્પષ્ટ રીતે જોવા મળ્યું હતું.’
