એકની ફ્લૅટમાં હત્યા કર્યા બાદ બીજીને કાર નીચે કચડી નાખી

અમેરિકાના કૅલિફૉર્નિયામાં મૂળ કેરલમની બે મહિલાઓની તેમની જ બહેનપણી દ્વારા ઘાતકી હત્યા

થ્રિસુરની ૩૫ વર્ષની અંજના હરિ અને તિરુવનંતપુરમની ૪૦ વર્ષની ઍન મૅથ્યુ

અમેરિકાના કૅલિફૉર્નિયામાં મૂળ કેરલમની બે મહિલાઓની તેમની જ બહેનપણી દ્વારા ઘાતકી હત્યા કરવામાં આવતાં ચકચાર મચી ગઈ હતી. ૨૮ ઑગસ્ટે મિલપિટાસ વિસ્તારના મિલ ક્રીક અપાર્ટમેન્ટમાં આ આઘાતજનક ઘટના બની હતી. થ્રિસુરની ૩૫ વર્ષની અંજના હરિ અને તિરુવનંતપુરમની ૪૦ વર્ષની ઍન મૅથ્યુના ડબલ મર્ડરના કેસમાં પોલીસે કોટ્ટાયમની વતની અનિલાની ધરપકડ કરી છે.

ત્રણેય મહિલાઓ એક જ અપાર્ટમેન્ટમાં પરિવાર સાથે રહેતી હતી અને થોડા દિવસ પહેલાં જ તેમણે સાથે ઓણમની ઉજવણી કરી હતી. આરોપી અનિલાએ પહેલાં ઍન મૅથ્યુની તેના ફ્લૅટમાં જ હત્યા કરી હતી. ત્યાર બાદ તેણે અંજનાને પાર્કિંગમાં બોલાવીને પોતાની કાર નીચે કચડી નાખી હતી. અંજનાનું ઘટનાસ્થળે જ કમકમાટીભર્યું મોત થયું હતું, જ્યારે ઍન મૅથ્યુનો પતિ ઑફિસથી ઘરે પહોંચ્યો ત્યારે પત્નીની લાશ જોઈને હેબતાઈ ગયો હતો.

ADVERTISEMENT

કેન્દ્રીય પ્રધાન સુરેશ ગોપીએ બન્ને મહિલાઓના પાર્થિવ દેહ ભારત લાવવા માટે તમામ જરૂરી પગલાં લેવાની ખાતરી આપી છે. હાલમાં અમેરિકાની પોલીસ આ હત્યાકાંડ પાછળનું ચોક્કસ કારણ જાણવા માટે સઘન તપાસ કરી રહી છે.