સમર-ફૅશનની કૂલ અને ટ્રેન્ડી ઍક્સેસરી એટલે બકેટ હૅટ

બકેટ હૅટ અત્યારે ફૅશન-વર્લ્ડમાં સૌથી લોકપ્રિય અને ટ્રેન્ડી ઍક્સેસરીઝમાંની એક છે. એ માત્ર તડકાથી રક્ષણ જ નથી આપતી, કોઈ પણ આઉટફિટને કૂલ અને અનોખો લુક પણ આપે છે

બકેટ હૅટ

જો તમે ઉનાળામાં સુવિધાજનક, હવાદાર અને સ્ટાઇલિશ દેખાવા માગતા હો તો બકેટ હૅટ ચોક્કસપણે તમારા વૉર્ડરોબમાં હોવી જોઈએ. એ એક એવો ટ્રેન્ડ છે જે લાંબા સમય સુધી ટકી રહેવા માટે આવ્યો છે. હાલમાં ફૅશનમાં ૧૯૯૦ના દાયકાની અને ૨૦૦૦ની શરૂઆતની સ્ટાઇલ ખૂબ લોકપ્રિય છે. બકેટ હૅટ એ સમયનો એક મુખ્ય હિસ્સો હતી. તેથી એ ફરીથી ટ્રેન્ડમાં આવી છે. રિહાના, હેલી બીબર, જીજી હદીદ, બિલી આઇલિશ અને કે-પૉપ સ્ટાર્સ જેવી વિશ્વભરની સેલિબ્રિટીઝ બકેટ હૅટ પહેરેલી વારંવાર જોવા મળે છે. સોશ્યલ મીડિયા પર પણ આ હૅટ ખૂબ વાઇરલ છે. અત્યારે બકેટ હૅટ્સમાં ઘણી વરાઇટી ઉપલબ્ધ છે. કૉટન, ડેનિમ, નાઇલૉન, ક્રોશેટ, ફર જેવાં વિવિધ કાપડ અને અસંખ્ય રંગો-પ્રિન્ટ્સમાં એ મળે છે. ઉનાળામાં બકેટ હૅટ પહેરવાના અનેક ફાયદા છે. બકેટ હૅટની ગોળાકાર કિનારી ચહેરા, ગરદન અને કાનને સૂર્યનાં હાનિકારક કિરણોથી બચાવવામાં મદદ કરે છે જે ઉનાળામાં ગરમી અને સ્કિન-ડૅમેજથી બચવા માટે ખૂબ જરૂરી છે. એ પહેરવામાં ખૂબ જ આરામદાયક અને વજનમાં હલકી હોય છે. કૉટન કે લિનન ફૅબ્રિકની બકેટ હૅટ પરસેવો શોષી લે છે અને ઠંડક આપે છે. બીચ-વેકેશન, પૂલ-પાર્ટી, હાઇકિંગ અથવા મ્યુઝિક-ફેસ્ટિવલ માટે બકેટ હૅટ એક પર્ફેક્ટ અને સ્ટાઇલિશ ઍક્સેસરી છે. એ કોઈ પણ સાદા આઉટફિટને કૂલ અને એફર્ટલેસ બનાવે છે.

કેવી રીતે સ્ટાઇલ કરશો?

ADVERTISEMENT

બકેટ હૅટને વિવિધ આઉટફિટ સાથે સરળતાથી સ્ટાઇલ કરી શકાય છે. કૅઝ્યુઅલ લુક માટે એને ટી-શર્ટ, ડેનિમ શૉર્ટ્‍સ અને સ્નીકર્સ સાથે પહેરો. સમર ડ્રેસ અથવા મૅક્સી ડ્રેસ સાથે બકેટ હૅટ કૂલ અને રિલૅક્સ્ડ વેકેશન લુક આપે છે. સ્ટ્રીટ-સ્ટાઇલ માટે ઓવરસાઇઝ્ડ ટી-શર્ટ, કાર્ગો પૅન્ટ્સ અને સ્નીકર્સ સાથે બકેટ હૅટ ખૂબ ટ્રેન્ડી લાગે છે. જો તમે થોડો ગ્લૅમરસ લુક ઇચ્છતા હો તો મોનોક્રોમ આઉટફિટ સાથે બ્રાઇટ કલરની બકેટ હૅટ પસંદ કરી શકો છો.

જો તમે સિમ્પલ આઉટફિટ પહેરી રહ્યા હો તો પ્રિન્ટેડ અથવા બ્રાઇટ કલરની બકેટ હૅટ પસંદ કરો. જ્યારે આઉટફિટ પહેલેથી જ પ્રિન્ટેડ હોય ત્યારે સૉલિડ કલરની બકેટ હૅટ વધુ બૅલૅન્સ્ડ લુક આપે છે.

ઉપરાંત તમારા ચહેરાના આકાર પ્રમાણે સાઇઝ અને કિનારીની પહોળાઈ પસંદ કરવી જોઈએ. જો તમારો ચહેરો ગોળ હોય તો થોડી પહોળી કિનારીવાળી બકેટ હૅટ પસંદ કરવી વધુ સારી લાગે છે, કારણ કે એ ચહેરાને થોડો લાંબો દેખાડે છે. જ્યારે લાંબા અથવા ઓવલ ચહેરા માટે મધ્યમ પહોળાઈની કિનારીવાળી હૅટ વધુ સંતુલિત લુક આપે છે. જો ચહેરો ચોરસ આકારનો હોય તો થોડી સૉફ્ટ અને ઢીલી કિનારીવાળી બકેટ હૅટ ચહેરાની તીક્ષ્ણ લાઇન્સને નરમ બનાવે છે.

આછા રંગો અને મિનિમલ પ્રિન્ટ્સ સમર માટે વધુ સારાં લાગે છે. સફેદ, બેજ, પેસ્ટલ બ્લુ, પિન્ક અથવા મિન્ટ ગ્રીન જેવા આછા રંગોની બકેટ હૅટ ઉનાળામાં તાજગીભર્યો અને હળવો લુક આપે છે. જ્યારે નાની ફ્લોરલ પ્રિન્ટ, સ્ટ્રાઇપ્સ અથવા સિમ્પલ લોગોવાળી મિનિમલ ડિઝાઇનવાળી બકેટ હૅટ કોઈ પણ કૅઝ્યુઅલ આઉટફિટ સાથે સરળતાથી મૅચ થઈ જાય છે.