૭૦મા નૅશનલ અવૉર્ડ‍્સ જાહેર થયા- કચ્છ એક્સપ્રેસ માટે માનસી પારેખ બેસ્ટ ઍક્ટ્રેસ

તામિલ અભિનેત્રી નિત્યા મેનન પણ બેસ્ટ ઍક્ટ્રેસ : કાંતારાનો રિષબ શેટ્ટી બેસ્ટ ઍક્ટર: ઊંચાઈ માટે બેસ્ટ ડિરેક્ટરનો અવૉર્ડ સૂરજ બડજાત્યાને : બેસ્ટ હિન્દી ફિલ્મ ગુલમોહર

‘ગુલમોહર’નું દૃશ્ય, ‘તિરુચિત્રમ્બલમ’માં નિત્યા મેનન, ‘કંતારા’માં રિષબ શેટ્ટી

ભારત સરકારના પ્રતિષ્ઠિત ૭૦મા નૅશનલ ફિલ્મ અવૉર્ડની ગઈ કાલે જાહેરાત કરવામાં આવી છે. આ અવૉર્ડની જાહેરાત ૨૦૨૨માં રિલીઝ થયેલી ફિલ્મો માટે કરવામાં આવી છે. એમાં ‘કાંતારા’ માટે રિષબ શેટ્ટીને બેસ્ટ ઍક્ટરના અવૉર્ડની ઘોષણા કરવામાં આવી છે. ગુજરાતી ફિલ્મ ‘કચ્છ એક્સપ્રેસ’ જે જાન્યુઆરી ૨૦૨૩માં રિલીઝ થઈ હતી એના માટે માનસી પારેખને બેસ્ટ ઍક્ટ્રેસના અવૉર્ડની જાહેરાત કરવામાં આવી છે. માનસી આ અવૉર્ડ ૨૦૨૨માં આવેલી તામિલ ફિલ્મ ‘તિરુચિત્રમ્બલમ’ની ઍક્ટ્રેસ નિત્યા મેનન સાથે શૅર કરવાની છે. ખાસ વાત એ છે કે આ વખતે બૉલીવુડની કોઈ ઍક્ટ્રેસનું નામ નૅશનલ ફિલ્મ અવૉર્ડ માટે જાહેર નથી કરવામાં આવ્યું. સાથે જ ૨૦૨૩માં ડિઝની + હૉટસ્ટાર પર રિલીઝ થયેલી ફિલ્મ ‘ગુલમોહર’ને બેસ્ટ ફિલ્મનો અવૉર્ડ મળ્યો છે. રાહુલ વી. ચિટ્ટેલાએ ડિરેક્ટ કરેલી આ ફિલ્મમાં મનોજ બાજપાઈ અને શર્મિલા ટાગોર લીડ રોલમાં હતાં.

ભારત સરકાર દ્વારા ભારતીય કળા અને વારસાને પ્રોત્સાહન આપવા માટે ૧૯૫૪માં આ અવૉર્ડની શરૂઆત કરવામાં આવી હતી. ૭૦મો નૅશનલ ફિલ્મ અવૉર્ડ‍્સ અને દાદા સાહેબ ફાળકે અવૉર્ડ આ વર્ષે ઑક્ટોબરમાં રાષ્ટ્રપતિ દ્રૌપદી મુર્મુના હસ્તે આપવામાં આવશે.  

ADVERTISEMENT