ફિલ્મે બીજા શુક્રવારે ૧૫ કરોડની કમાણી સાથે ૩૦૦ કરોડ રૂપિયા તરફ દોટ મૂકી છે
‘દૃશ્યમ : ધ કન્ક્લુઝન’
‘દૃશ્યમ : ધ કન્ક્લુઝન’એ બીજા સપ્તાહના વીકએન્ડની શરૂઆત જોરદાર કમાણી સાથે કરી છે. ફિલ્મે બીજા શુક્રવારે ૧૫ કરોડ રૂપિયાની કમાણી કરી હતી. આ સાથે ફિલ્મની ભારતીય બૉક્સ-ઑફિસ પર ટોટલ નેટ ઇન્કમ ૨૫૮.૫૦ કરોડ રૂપિયા થઈ ગઈ છે. આમ આ ફિલ્મે ૨૫૦ કરોડ રૂપિયાનો આંકડો પાર કરી લીધો છે અને હવે એ ઝડપથી ૩૦૦ કરોડ રૂપિયાના આંકડા તરફ આગળ વધી રહી છે. બીજા શુક્રવારે કમાણીમાં થયેલો અસાધારણ વધારો નિર્દેશ કરે છે કે ‘દૃશ્યમ : ધ કન્ક્લુઝન’ લાંબી રેસનો ઘોડો સાબિત થઈ રહી છે.
આ શુક્રવારે કોઈ મોટી ફિલ્મ રજૂ ન થઈ હોવાનો ફાયદો પણ ‘દૃશ્યમ : ધ કન્ક્લુઝન’ને મળ્યો છે. બૉક્સ-ઑફિસ પર અન્ય કોઈ મોટી ફિલ્મની સ્પર્ધા ન હોવાથી એને કમાણી માટે ખુલ્લું મેદાન મળ્યું છે.
