ત્રીજી T20 મૅચોમાં સાઉથ આફ્રિકા સામે ન્યુ ઝીલૅન્ડની મેન્સ ટીમે ૮ વિકેટે અને વિમેન્સ ટીમે ૬ વિકેટે વિજય મેળવ્યો...
ઓપનર ટૉમ લૅધમે ન્યુ ઝીલૅન્ડ માટે ૬૩ રનની મૅચવિનિંગ ઇનિંગ્સ રમી હતી.
ન્યુ ઝીલૅન્ડ અને સાઉથ આફ્રિકાની મેન્સ-વિમેન્સ ટીમના ડબલ હેડરમાં ત્રીજી T20 મૅચ બાદ યજમાન ન્યુ ઝીલૅન્ડની બન્ને ટીમોએ પાંચ મૅચની સિરીઝમાં ૨-૧થી લીડ મેળવી છે. ત્રીજી T20 મૅચ પહેલાં બન્ને સિરીઝ ૧-૧ બરાબર હતી. ગઈ કાલે સવારે સાઉથ આફ્રિકા સામે ન્યુ ઝીલૅન્ડની મહિલા ટીમે ૬ વિકેટે અને બપોરે મેન્સ ટીમે ૮ વિકેટે જીત નોંધાવી હતી.
સોફી ડિવાઇને કર્યું ઑલરાઉન્ડ પ્રદર્શન
સાઉથ આફ્રિકાની મહિલા ટીમે ત્રીજી મૅચમાં ૭ વિકેટ ગુમાવીને ૧૪૯ રનનો સ્કોર કર્યો હતો. ન્યુ ઝીલૅન્ડે ૪ વિકેટ ગુમાવીને ૧૮.૪ ઓવરમાં ૧૫૨ રન કરીને ૧૫૦ રનનો ટાર્ગેટ ચેઝ કર્યો હતો. અનુભવી ઑલરાઉન્ડર સોફી ડિવાઇને ચોથા ક્રમે રમીને ૩૮ બૉલમાં ૬ ફોર અને એક સિક્સના આધારે અણનમ પંચાવન રન ફટકાર્યા હતા. તેણે મૅચવિનિંગ ઇનિંગ્સ પહેલાં ૩ ઓવરમાં ૨૧ રન આપીને બે વિકેટ પણ લીધી હતી.
મિચલ સૅન્ટનર ઍન્ડ કંપની સામે સાઉથ આફ્રિકા નબળું પડ્યું
કેશવ મહારાજની આગેવાની હેઠળની સાઉથ આફ્રિકાની ટીમ ૯ વિકેટ ગુમાવીને ૧૩૬ રન જ કરી શકી હતી. ન્યુ ઝીલૅન્ડે ૧૬.૨ ઓવરમાં બે વિકેટ ગુમાવીને ૧૩૭ રનનો ટાર્ગેટ સરળતાથી ચેઝ કર્યો હતો. બોલિંગ દરમ્યાન ફાસ્ટ બોલર લૉકી ફર્ગ્યુસને ૪ ઓવરમાં માત્ર ૯ રન આપીને એક વિકેટ લીધી હતી. કૅપ્ટન મિચલ સૅન્ટનર સહિતના ૩ બોલર્સે ૨-૨ વિકેટ પણ ઝડપી હતી. રન-ચેઝ દરમ્યાન ઓપનર ટૉમ લૅધમે ૭ ફોર, બે સિક્સની મદદથી પંચાવન બૉલમાં ૬૩ રનની અણનમ ઇનિંગ્સ રમી હતી.
