પોલીસ-કમિશનર વિશ્વાસ નાંગરે-પાટીલે સ્પષ્ટતા કરીને કહ્યું કે મલ્ટિલેયર DJ નહીં વગાડી શકાય, વગાડવું જ હોય તો ડેસિબલ લિમિટ જાળવીને વગાડો
પ્રેસ-કૉન્ફરન્સને સંબોધી રહેલા નાગપુરના પોલીસ-કમિશનર વિશ્વાસ નાંગરે પાટીલ.
પુણેમાં બહુ જ મોટા અવાજ સાથે ડિસ્ક જૉકી (DJ) દ્વારા મ્યુઝિક વગાડવામાં આવતું હોવાથી લોકોને એનાથી હાડમારી ઉઠાવવી પડે છે અને એ નૉઇસ-પૉલ્યુશન વધારે છે એટલે એના પર બંધી મૂકવામાં આવે એવી માગણી કરનાર ઍક્ટિવિસ્ટ વિદ્યાનંદ બાપટને એક મંડળના પદાધિકારીએ લાફો મારી દેતાં આ મુદ્દો હાલ ચર્ચાના ચકડોળે ચડ્યો છે. ડૅશિંગ પોલીસ-ઑફિસરની ઇમેજ ધરાવતા નાગપુરના પોલીસ-કમિશનર વિશ્વાસ નાંગરે પાટીલે નાગપુરમાં પહેલી નવેમ્બર સુધી DJ પર બંધી મૂકી દેતાં મામલો વધુ ગરમાયો હતો. વળી DJના સમર્થનમાં અને DJના વિરોધમાં એમ બન્ને પક્ષો તરફથી આ મુદ્દે દલીલો કરવામાં આવી હતી. નાગપુરના ભારતીય જનતા પાર્ટી (BJP)ના વિધાનસભ્ય સંદીપ જોશીએ પણ DJ પર બંધી મૂકવાની રજૂઆત કરી હતી. જોકે એ પછી BJPમાંથી જ વિરોધનો સૂર ઊઠ્યો હતો. પાર્ટીના સેન્ટ્રલ નાગપુરના વિધાનસભ્ય પ્રવીણ દટકેએ કહ્યું હતું કે ‘માત્ર હિન્દુઓના તહેવારો વખતે જ કેમ DJ પર બંધી મુકાય છે? પોલીસ આ સંદર્ભે કાઢેલું નોટિફિકેશન પાછું ખેંચે.’
આખરે નાગપુરના પોલીસ-કમિશનર વિશ્વાસ નાંગરે પાટીલે ગઈ કાલે પ્રેસ-કૉન્ફરન્સ યોજીને સ્પષ્ટતા કરતાં કહ્યું હતું કે ‘સાઉન્ડ સિસ્ટમમાંથી અવાજ આવશે એના પર બંધી નથી, પણ મલ્ટિલેયર સાઉન્ડ સિસ્ટમનો નોટિફિકેશનમાં ઉલ્લેખ કરવામાં આવ્યો છે. એમાં બેઝ, મિડિયમ અને ટૉપ એમ ૩ લેયર હોય છે. એમાં જે બેઝ લેયર હોય છે એ કંપન ઉત્પન્ન કરે છે. એનાથી શરીરને નુકસાન થાય છે. ૬૦ દિવસ દરમ્યાન આવી મલ્ટિલેયર સાઉન્ડ સિસ્ટમ સામે કાર્યવાહી થશે. એ પછી આ નોટિકેશન નવેસરથી બનાવવામાં આવશે.’
