ધમકીભરી ઈ-મેઇલે પોલીસને દોડતી કરી દીધી

મુંબઈની અનેક સ્કૂલો, BMC હેડક્વૉર્ટર, અમિતાભનો જલસા બંગલો અને દિલજિત દોસાંઝને બૉમ્બથી ઉડાવી દેવાની વાત જોકે પોકળ નીકળી

પ્રતીકાત્મક ફાઇલ તસવીર

બૃહન્મુંબઈ મ્યુનિસિપલ કૉર્પોરેશન (BMC)નું હેડક્વૉર્ટર, અનેક સ્કૂલો જેમાં મુંબઈમાં આવેલી અમેરિકન સ્કૂલનો પણ સમાવેશ થતો હતો અને અમિતાભ બચ્ચનના જલસા બંગલાને બૉમ્બબ્લાસ્ટ કરીને ઉડાડી દેવાની અને આત્મઘાતી હુમલો કરીને સિંગર દિલજિત દોસાંઝને ઉડાવી દેવાની ઈ-મેઇલ મળતાં મુંબઈ પોલીસ ગઈ કાલે દોડતી થઈ ગઈ હતી અને સઘન તપાસ કરવામાં આવી હતી. જોકે એ તપાસમાં કશું પણ શંકાસ્પદ મળ્યું નહોતું અને એ ઈ-મેઇલ અફવા જ નીકળી હતી. જોકે કેટલીક સ્કૂલોને સાવચેતીરૂપે છોડી મુકાઈ હતી. અમિતાભ બચ્ચનને ડાયરેક્ટ ઈ-મેઇલ નથી મળી, પણ ઈ-મેઇલમાં તેમના જલસા બંગલાને પણ ઉડાવી દેવાશે એવો ઉલ્લેખ કરવામાં આવ્યો છે. સિંગર દિલજિત દોસાંઝની કૉન્સર્ટ
૨૭ નવેમ્બરે મહાલક્ષ્મી રેસકોર્સમાં થવાની છે.

મુંબઈનાં મેયર રિતુ તાવડેના ઑફિશ્યલ ઈ-મેઇલ પર સવારે ૧૧.૩૦ વાગ્યે ધમકી આવી હતી. એ ધમકીવાળી ઈ-મેઇલ smithjohnson6889@gmail.com પરથી મોકલવામાં આવી હતી જેમાં કહેવાયું હતું...

ADVERTISEMENT

• મુંબઈ બોલેગા ખાલિસ્તાન ઝિંદાબાદ
• મુંબઈ મેયર ઑફિસ @ 3:11 pm
• સ્કૂલ 1:11 Pm
• અપને બચ્ચે બચાઓ
• બચ્ચનનો ‘જલસા’ ૩૧ ઑક્ટોબર ’૨૭ સુધી નિશાના પર રહેશે.
• ૩૧ ઑક્ટોબરે બાળકોને ગ્રેનેડ હુમલો કરીને મારી નખાશે
• ૧૯૮૪નો ‘ખૂન દા બદલા ખૂન’ નારો આપીને સિખોનો નરસંહાર કરાવ્યો
• ૨૭ નવેમ્બરે દિલજિતને મહાલક્ષ્મી રેસકોર્સ પર આત્મઘાતી હુમલો કરીને મારી નખાશે, જેથી નરસંહાર વખતે મરી ગયેલાં બાળકોને પગે લાગી શકે.
• મહાલક્ષ્મી રેસકોર્સ પર ૨૭ નવેમ્બરે બૉમ્બધડાકો, દિલજિત દોસાંઝને ખતમ કરવામાં આવશે.
• - ખાલિસ્તાન નૅશનલ આર્મી

- એન્જિ. ગુરનાનક સિંહ

- રુકાન શાહવાલા

- ડૉ. ગુરનિવાઇર સિંહ

- ખાન રાજડા

- બબ્બર ખાલસા (પરમાર –કૅનેડા)

- પ્રો. ગુરાકાલ સિંહ Phd

- ખેમ કરન

- પ્રો. ગુરઅંગાર સિંહ

- જંદીઆલા ગુરુ

મુંબઈ પોલીસના કહેવા મુજબ આ ઈ-મેઇલની જવાબદારી પોતાને ખાલિસ્તાન નૅશનલ આર્મી (KNA) તરીકે ઓળખાવતા ગ્રુપે લીધી છે. પોલીસે દરેક જગ્યાએ ઝીણવટભરી તપાસ કરવા છતાં કશું પણ શંકાસ્પદ મળ્યું નહોતું. ડેપ્યુટી કમિશનર ઑફ પોલીસ (ઝોન વન) મનીષ કાલવાણિયાએ કહ્યું હતું કે ‘BMCની ઑફિસને આ ઈ-મેઇલ મળી હતી. એ પછી તપાસ કરવામાં આવી હતી. કશું પણ શંકાસ્પદ મળ્યું નથી. અમને શંકા છે કે આ ઈ-મેઇલ આ જ KNA ગ્રુપ દ્વારા મોકલવામાં આવી હોઈ શકે જેણે ભૂતકાળમાં કેટલાક મહિના પહેલાં આવી ધમકીભરી ઈ-મેઇલ મોકલી હતી.’