ફ્લોરિડાના નવા સીમાંકનવાળા ૨૨મા ડિસ્ટ્રિક્ટમાં, ૩૯ વર્ષીય પિયા દાંડિયાએ રિપબ્લિકન ઉમેદવાર કેસી અસ્કરને હરાવીને ૫૧.૯ ટકા મતો મેળવ્યા. તેમનો ઉછેર પામ બીચ કાઉન્ટીમાં થયો અને અગાઉ ન્યૂયૉર્કના હાર્લેમમાં હાઈ સ્કૂલના આચાર્ય તરીકે સેવા આપી ચૂક્યા છે.
ડૉ. અમીશ શાહ (તસવીર: એજન્સી)
અમેરિકાની મિડટર્મ ચૂંટણીમાં ભારતીય મૂળના અનેક ઉમેદવારોએ મોટી જીત મેળવી છે. તેમાં જ ભારતીય-અમેરિકન ચિકિત્સક અમીશ શાહે એરિઝોનાના કૉંગ્રેશનલ ડિસ્ટ્રિક્ટમાંથી વિજય મેળવ્યો છે. ૪૮ વર્ષીય અમીશ શાહ આ રાજ્યમાંથી અમેરિકન કૉંગ્રેસમાં પહોંચનાર પહેલા ભારતીય-અમેરિકન બન્યા છે. તેમણે રિપબ્લિકન ઉમેદવાર અને નૅશનલ ફૂટબૉલ લીગ (NFL)ના ભૂતપૂર્વ ખેલાડી જે ફીલીને હરાવ્યા. શાહને ૫૨.૪૯ ટકા મત મળ્યા, જ્યારે ફીલીને ૪૫.૪૫ ટકા મત મળ્યા. આ જીત સાથે, અમેરિકન હાઉસ ઓફ રિપ્રેઝન્ટેટિવ્સમાં ભારતીય મૂળના સભ્યોની સંખ્યા વધીને છ થઈ ગઈ છે. ફ્લોરિડામાંથી પિયા દાંડિયાએ પણ જીત મેળવી છે. બીજી તરફ, મિશિગનમાં શ્રી થાનેદાર ડૅમોક્રેટિક પ્રાઈમરી ચૂંટણી હારી ગયા, અને ઈલિનોઈસમાંથી સેનેટની ચૂંટણી લડનારા રાજા કૃષ્ણમૂર્તિને પણ સફળતા મળી નહીં.
અમીશ શાહની રાજકીય અને શૈક્ષણિક સફર
ADVERTISEMENT
અમીશ શાહનો જન્મ શિકાગોમાં થયો હતો. તેમના માતા-પિતા ગુજરાતી હતા, જેઓ ૧૯૬૦ના દાયકામાં અમેરિકા સ્થળાંતર થયા હતા. તેમના પિતા જૈન છે અને માતા હિન્દુ છે. તેમણે નોર્થવેસ્ટર્ન યુનિવર્સિટી અને તેની મૅડિકલ સ્કૂલમાં અભ્યાસ કર્યો હતો, અને ત્યારબાદ યુનિવર્સિટી ઓફ કૅલિફોર્નિયા, બર્કલેમાંથી `પબ્લિક હૅલ્થ`માં માસ્ટર ડિગ્રી મેળવી હતી. તેમણે ન્યૂયૉર્કના એક મુખ્ય ટ્રૉમા સેન્ટરમાં `ઇમરજન્સી મૅડિસિન`માં તાલીમ પૂર્ણ કરી હતી. તેઓ એરિઝોના હાઉસ ઓફ રિપ્રેઝન્ટેટિવ્સના સભ્ય તરીકે ત્રણ કાર્યકાળ સુધી સેવા આપી ચૂક્યા છે. શાહ અને તેમના પ્રતિસ્પર્ધી જે ફીલી વચ્ચે અગાઉનો પણ એક સંબંધ છે. શાહે NFLની ટીમ `ન્યૂયૉર્ક જૅટ્સ` માટે ઇમરજન્સી તબીબી સેવાઓ પૂરી પાડી હતી, જે ટીમ માટે એક સમયે ફીલી રમતા હતા. પોતાની જીત બાદ, શાહે સોશિયલ મીડિયા પર લખ્યું, "એરિઝોના, તમારા આગામી કૉંગ્રેસ સભ્ય બનવું એ મારા જીવનનું સૌથી મોટું સન્માન છે." તેમણે આકરી સ્પર્ધા બદલ ફીલીને અભિનંદન આપ્યા અને જણાવ્યું કે તેઓ તમામ મતદારોનું પ્રતિનિધિત્વ કરશે—ભલે તેઓએ તેમને મત આપ્યો હોય કે ન આપ્યો હોય. તેમણે ફુગાવો ઘટાડવા, આરોગ્ય સેવાઓનો વિસ્તાર કરવા, પાણીની સમસ્યાનું નિરાકરણ લાવવા અને અર્થતંત્રને મજબૂત કરવા પ્રત્યેની પોતાની પ્રતિબદ્ધતા પર ભાર મૂક્યો હતો.
View this post on Instagram
પિયા દાંડિયા અને અન્ય ભારતીય-અમેરિકન ઉમેદવારો વિશે
ફ્લોરિડાના નવા સીમાંકનવાળા ૨૨મા ડિસ્ટ્રિક્ટમાં, ૩૯ વર્ષીય પિયા દાંડિયાએ રિપબ્લિકન ઉમેદવાર કેસી અસ્કરને હરાવીને ૫૧.૯ ટકા મતો મેળવ્યા. પિયાનો ઉછેર પામ બીચ કાઉન્ટીમાં થયો અને તેઓ અગાઉ ન્યૂયૉર્કના હાર્લેમમાં હાઈ સ્કૂલના આચાર્ય તરીકે સેવા આપી ચૂક્યા છે. અમી બેરાએ કેલિફોર્નિયાના ત્રીજા ડિસ્ટ્રિક્ટનું પ્રતિનિધિત્વ કરતા તેમની આઠમી ટર્મ જીતી લીધી છે. રો ખન્ના કૅલિફોર્નિયાના ૧૭મા ડિસ્ટ્રિક્ટમાંથી છઠ્ઠી ટર્મ માટે ચૂંટાયા, જ્યારે સુહાસ સુબ્રમણ્યમે વર્જિનિયાના ૧૦મા ડિસ્ટ્રિક્ટમાંથી બીજી વખત જીત મેળવી. પ્રમિલા જયપાલે વૉશિંગ્ટનના ૭મા ડિસ્ટ્રિક્ટનું પ્રતિનિધિત્વ કરતા છઠ્ઠી વખત જીત મેળવી. મૅરીલૅન્ડના લૅફ્ટનન્ટ ગવર્નર અરુણા મિલર પણ ફરીથી ચૂંટાઈ આવ્યા છે. જોકે, ઓહાયોમાં વિવેક રામાસ્વામીને ડેમોક્રેટિક ઉમેદવાર એમી ઍક્ટન સામે હારનો સામનો કરવો પડ્યો. નૉર્થ કેરોલિનાના ચોથા ડિસ્ટ્રિક્ટમાં મહેશ ગનોરકર પણ પરાજિત થયા. ટૅક્સાસમાં, ડેમોક્રેટિક ઉમેદવાર પૂજા સેઠીએ હાઉસ ડિસ્ટ્રિક્ટ ૪૭માં જીત મેળવી છે. તેઓ ટૅક્સાસ વિધાનસભામાં સેવા આપનાર પહેલા ભારતીય-અમેરિકન અને હિન્દુ મહિલા બન્યા છે. બીજી તરફ, ડિસ્ટ્રિક્ટ ૬૬ની ચૂંટણીમાં સંદીપ શ્રીવાસ્તવને હાર મળી. અમેરિકન કૉંગ્રેસના નવા સભ્યો ૩ જાન્યુઆરી, ૨૦૨૭ના રોજ શપથ લેશે. અમેરિકામાં ભારતીય મૂળના ૫૦ લાખથી વધુ લોકો વસે છે, જે તેમને દેશના સૌથી મોટા એશિયન મૂળના સમુદાયોમાંના એક બનાવે છે.
