ફિલ્મમેકર સાજિદ નડિયાદવાલાએ ગઈ કાલે સલમાન ખાનની ફિલ્મ ‘કિક’ની સીક્વલની જાહેરાત કરી હતી
સલમાન ખાન
ફિલ્મમેકર સાજિદ નડિયાદવાલાએ ગઈ કાલે સલમાન ખાનની ફિલ્મ ‘કિક’ની સીક્વલની જાહેરાત કરી હતી. સલમાન અત્યારે ફિલ્મ ‘સિકંદર’નું શૂટિંગ કરી રહ્યો છે. સાજિદે ‘સિકંદર’ના સેટ પર જ કરેલા ફોટોશૂટની ઝલક દેખાડીને ‘કિક 2’ની જાહેરાત કરી હતી. સાજિદ નડિયાદવાલાના પ્રોડક્શન-હાઉસના ઇન્સ્ટાગ્રામ હૅન્ડલ પર સલમાનનો પીઠ દેખાડતો, સ્લીવલેસ ટી-શર્ટવાળો બ્લૅક ઍન્ડ વાઇટ ફોટો શૅર કરીને આ સીક્વલની અનાઉન્સમેન્ટ કરવામાં આવી હતી.
૨૦૧૪માં આવેલી ‘કિક’થી સાજિદ નડિયાદવાલાએ ડિરેક્શનમાં ઝંપલાવ્યું હતું. આ ઍક્શન કૉમેડી ફિલ્મમાં સલમાન સાથે જૅકલિન ફર્નાન્ડિસ, રણદીપ હૂડા અને નવાઝુદ્દીન સિદ્દિકી મુખ્ય ભૂમિકાઓમાં હતા. ‘કિક’ હકીકતમાં એ જ નામની ૨૦૦૯માં આવેલી તેલુગુ ફિલ્મની રીમેક હતી. સલમાન અત્યારે ‘સિકંદર’માં કામ કરી રહ્યો છે એ ‘ગજિની’વાળા એ.મુરુગાદોસની ફિલ્મ છે. એમાં રશ્મિકા મંદાના અને કાજલ અગરવાલ છે.
