બાલાજી ટેલિફિલ્મ્સે પોતાના નિવેદનમાં નવોદિત ઍક્ટર્સ અને ડિરેક્ટર્સને સાવચેત રહેવાની અપીલ કરી છે
એકતા કપૂર
બૉલીવુડમાં કાસ્ટિંગને લઈને ઘણી વખત ચર્ચાઓ થતી રહે છે. અનેક વખત કાસ્ટિંગની નકલી જાહેરાતો પણ સામે આવે છે જેને કારણે ઍક્ટર બનવા ઇચ્છુક નવા કલાકારો છેતરપિંડીનો ભોગ બને છે. હવે આવી જ નકલી જાહેરાતોથી બચાવવા માટે એકતા કપૂરની બાલાજી ટેલિફિલ્મ્સે સત્તાવાર નિવેદન જાહેર કર્યું છે. કંપનીએ લોકોને ચેતવણી આપી છે કે કેટલાક ઠગો અને નકલી સોશ્યલ મીડિયા અકાઉન્ટ્સ અમારી કંપનીના નામનો દુરુપયોગ કરીને નકલી કાસ્ટિંગ તકનો પ્રચાર કરી રહ્યાં છે.
બાલાજી ટેલિફિલ્મ્સે પોતાના નિવેદનમાં નવોદિત ઍક્ટર્સ અને ડિરેક્ટર્સને સાવચેત રહેવાની અપીલ કરી છે. કંપનીએ જણાવ્યું કે તેમના તરફથી જાહેર થતી કોઈ પણ કાસ્ટિંગ નોટિસની સત્તાવાર ચૅનલ દ્વારા પુષ્ટિ કરવી જરૂરી છે. કંપનીએ સ્પષ્ટ કર્યું કે આવા અનધિકૃત લોકો અથવા સંસ્થાઓ સાથે એમનો કોઈ સંબંધ નથી. કંપનીએ આવા ગેરકાયદે પ્રયાસોની કડક નિંદા કરી છે જે નવા કલાકારો અને દિગ્દર્શકોની આશાઓનું શોષણ કરે છે.
