08 December, 2024 12:30 PM IST | Mumbai | Gujarati Mid-day Correspondent
ગઈ કાલે દહિસરમાં નીકળેલી રૅલીમાં મોટી સંખ્યામાં લોકો જોડાયા હતા
બંગલાદેશમાં અલ્પસંખ્યક હિન્દુઓ પર થઈ રહેલા હુમલાઓને કારણે ભારતના હિન્દુઓમાં રોષ વ્યાપી ગયો છે અને એની વિરુદ્ધમાં ઠેર-ઠેર દેખાવો થઈ રહ્યા છે, સાથે જ હિન્દુ ધર્મની રક્ષા કાજે એક થાઓ એવી જાહેર હાકલ કરવામાં આવી છે. આજે ઘાટકોપર-ઈસ્ટના વિક્રાંત સર્કલ પાસેના હનુમાન મંદિર પાસે સાંજે ૪.૩૦ વાગ્યે મોટી સંખ્યામાં હિન્દુઓને હાજર રહી વિરોધ-પ્રદર્શનમાં ભાગ લેવાનો અનુરોધ કરવામાં આવ્યો છે.
આજે વેસ્ટર્ન સબર્બ્સમાં પણ દહિસરથી અંધેરી વેસ્ટર્ન એક્સપ્રેસ હાઇવે પર આ જ મુદ્દે માનવસાંકળ રચી વિરોધ-પ્રદર્શન કરવાનું આયોજન કરવામાં આવ્યું છે. સકલ હિન્દુ સમાજ દ્વારા ભાઈંદર ઈસ્ટમાં ગોલ્ડન નેસ્ટ સર્કલ પાસે આજે સવારે ૧૦ વાગ્યે વિરોધ-પ્રદર્શનનું આયોજન કરવામાં આવ્યું છે.
ગઈ કાલે દહિસર-ઈસ્ટમાં ‘બંગલાદેશ હિન્દુ ન્યાય યાત્રા’ હેઠળ કરવામાં આવેલા વિરોધ-પ્રદર્શન અંતર્ગત એક રૅલી કાઢવામાં આવી હતી જેમાં સિગ્નેચર કૅમ્પેન પણ ચલાવવામાં આવ્યું હતું અને મહાઆરતીનું આયોજન કરવામાં આવ્યું હતું જેમાં મોટી સંખ્યામાં લોકો જોડાયા હતા.