19 April, 2026 11:27 AM IST | Mumbai | Gujarati Mid-day Correspondent
મનન ફુરિયા, પર્લ સાવલા
૯૮.૬૭ ટકા સાથે પાસ થયેલા બોરીવલીના મનન ફુરિયાને કૉમર્સ ક્ષેત્રમાં ઍક્ચ્યુઅરી કરવું છે
બોરીવલી-વેસ્ટના રૉયલ કૉમ્પ્લેક્સમાં રહેતો CBSE બોર્ડના દસમા ધોરણનો વિદ્યાર્થી મનન ફુરિયા પરીક્ષામાં બેસ્ટ ઑફ ફાઇવના ધોરણે ૫૦૦માંથી ૪૯૫ માર્ક સાથે ૯૮.૬૭ ટકા મેળવીને બોરીવલીની માતુશ્રી કાશીબેન વ્રજલાલ વળિયા (MKVV) ઇન્ટરનૅશનલ વિદ્યાલયમાં ટૉપર બન્યો છે. મનન તેની સફળતાનું શ્રેય તેનાં દાદી જશીબહેનને આપે છે. ભવિષ્યમાં મનન કૉમર્સ કરીને ઍક્ચ્યુઅરી ક્ષેત્રમાં આગળ વધવા માગે છે. એની સાથે તે સિવિલ સર્વિસિસમાં જવાનું પ્લાનિંગ પણ કરી રહ્યો છે. મનનની સફળતા વિશેની માહિતી આપતાં દહિસરમાં મેડિકલ સ્ટોર સંભાળી રહેલી મનનની મમ્મી જિજ્ઞા ફુરિયાએ ‘મિડ-ડે’ને કહ્યું હતું કે ‘મનન ૬ વર્ષનો હતો ત્યારે જ તેના પપ્પા મૃત્યુ પામ્યા હતા. તેના પપ્પાના મૃત્યુના ૮ મહિનામાં જ તેના દાદા પણ મૃત્યુ પામ્યા હતા. અમે સંયુક્ત પરિવારમાં રહીએ છીએ. મારાં અને મારા જેઠનાં બધાં બાળકોને મારાં સાસુ જશીબહેને ઘરમાં ટ્યુશન કરીને ભણાવ્યાં છે. મનન નાનપણથી જ મસ્તીખોર હતો. તે ભણ્યો છે મસ્તી કરતાં-કરતાં. તેણે ક્યારેય ભણવાનું સ્ટ્રેસ લીધું નથી. મનન અને તેની મોટી બહેન પંક્તિ હંમેશાં રમવાના સમયે રમવાનું અને ભણવાના સમયે ભણવાનું એ નિયમ સાથે તેમનો ગોલ નક્કી કરીને ભણ્યાં છે. મનન રમતગમતમાં અને અન્ય પ્રવૃત્તિઓમાં પણ અવ્વલ છે. જોકે તેની ભણવાની સ્ટાઇલથી તેના ટીચર્સ પણ પ્રભાવિત હતા. તેઓ હંમેશાં મનનનો આત્મવિશ્વાસ વધારવામાં સહાયરૂપ થતા હતા. મનન માને છે કે જે લોકો પોતાના જીવનનો ગોલ નક્કી કરીને આગળ વધે છે તેઓ જીવનમાં અગ્ર રહે છે. મનન અને તેની બહેન હંમેશાં ભણતી વખતે તેમનો ટાર્ગેટ નક્કી કરીને ભણે છે. મહત્ત્વનું છે કે બન્ને જણ પોતાના ટાર્ગેટને અચીવ કરવામાં પણ માસ્ટર છે. હંમેશાં સફળ રહે છે.’
ધાર્મિક ક્ષેત્રે પણ ટૉપર
મનન ફક્ત ભણવામાં જ નહીં, ધાર્મિક ક્ષેત્રે પણ ટૉપર છે. તેને જૈન ધર્મની આઠમા ધોરણની પરીક્ષા સારા માર્કે પાસ કરી છે. તે ચાતુર્માસ દરમ્યાન જ્યાં સાધુઓ ન હોય ત્યાં ચાતુર્માસ કરાવવા જાય છે અને વ્યાખ્યાન પણ આપે છે. તેની બહેન પણ દસમા ધોરણમાં ૯૮ ટકા લાવી હતી. અત્યારે તે નાયર હૉસ્પિટલમાં બૅચલર ઑફ ડેન્ટલ સર્જરીનો અભ્યાસ કરી રહી છે. મનનનાં મમ્મી અને દાદી મેડિકલ સ્ટોર સંભાળે છે.
સ્કોર-કાર્ડ
