ગુજરાતી મિડ-ડે ડૉટ કૉમ તમારી માટે લઈને આવ્યું છે `વન્ડર વુમન`ની ખાસ રજૂઆત. આમ તો સમાજની દરેક મહિલા પોતાના `સ્ત્રીત્વ`ના બળે જીવનમાં ઊંચાઈને પામે છે. વળી, આપણી આસપાસ પણ એવી અનેક મહિલાઓ છે, જેમના સમર્પણ, જુસ્સા અને અડગ નિશ્ચયે તેમને નવા મુકામ આપ્યા છે! એક સ્ત્રી ધારે તો શું ન કરી શકે? નિર્દોષ, નિષ્કામ ને નિરાભિમાની નજર વડે જોશો તો પુરુષ સમોવડી થયેલી અનેક સ્ત્રીઓના પ્રેરણાદાયી ઉદાહરણો તમને સાંપડશે. મોટી ઉંમરના ઉંબરાને પણ સહજતાથી ઠેંકીને સ્ત્રી પોતાના શોખને જીવંત કરતી હોય છે. અહીં અમે એવી જ પ્રેરક મહિલાઓની વાત માંડીશું જેઓએ ધીરજ અને આત્મવિશ્વાસની આંગળી પકડીને જીવનમાં નવેસરથી ડગ ભર્યાં છે. ન માત્ર પોતાના કે પોતાના પરિવાર માટે કિન્તુ સમાજના બળબળતાં પ્રશ્નો સામે ઝઝૂમવા માટે મીટ માંડી છે. બેચલરની ડિગ્રી હોય, બિઝનેસ હોય કે પછી હોય બોક્સિંગ! આ પ્રેરણાદાયી મહિલા તો સમાજની સૌ સ્ત્રી માટે અજવાળું બની છે. આજનાં આપણાં વન્ડર વુમન છે દિપ્તી બુચ. કાંદિવલીની કેઈએસ શ્રોફ કોલેજનાં પ્રોફેસર દિપ્તી બુચ ખરા અર્થમાં અનોખાં પ્રોફેસર છે. આ કાંઈ જેવાં તેવાં પ્રોફેસર નથી, પણ પાઠ્યપુસ્તકની બહારની દુનિયા સાથે પોતાના સ્ટુડન્ટ્સને અવગત કરાવે છે. તેઓ માત્ર કરસાનદાસ માણેકની પંક્તિઓ ‘દરિદ્ર, દુર્બળ, દીન અછૂતો અન્ન વિના અડવડતા, દેવદ્વારની બહાર ભટકતા ટુકડા કાજ ટળવળતા, તે દિન આંસુભીનાં રે, હરિનાં લોચનિયાં મેં દીઠાં!’આ કવિતા ભણાવતાં જ નથી, પણ તેમાંથી પ્રેરણા લઈ ખરા અર્થમાં બાળકોને સમાજસેવા તરફ દોરે છે.
26 February, 2025 09:52 IST | Mumbai | Dharmik Parmar
