29 September, 2026 08:26 PM IST | Mumbai | Gujarati Mid-day Online Correspondent
પ્રતીકાત્મક ફાઇલ તસવીર
મહારાષ્ટ્રમાં ખાસ કરીને મુંબઈમાં છેલ્લા ઘણા દિવસોથી વરસાદ ગાયબ હતો. જોકે મંગળવારે કોંકણ, મધ્ય મહારાષ્ટ્ર અને મરાઠવાડાના કેટલાક જિલ્લાઓમાં હળવાથી મધ્યમ વરસાદ શરૂ થયો છે. થોડા વિરામ બાદ કલ્યાણ-ડોમ્બિવલી, થાણે અને મુંબઈમાં ફરી વરસાદ શરૂ થયો, જેનાથી વાતાવરણમાં ઠંડક જણાઈ રહી છે. કલ્યાણમાં દિવસભર વાદળછાયું વાતાવરણ રહ્યું અને સાંજે અચાનક વરસાદ શરૂ થયો. આના કારણે કામ પરથી ઘરે પરત ફરતા લોકોને મુશ્કેલીનો સામનો કરવો પડ્યો. વરસાદ પહેલાં જોરદાર પવન ફૂંકાયો હતો, જેનાથી ઘણા લોકો અને વાહનચાલકોને હાલાકી ભોગવવી પડી હતી.
કલ્યાણ, થાણે, મુંબઈ, નાશિકના ઘાટમાથા વિસ્તાર, રાયગઢ, રત્નાગિરી, પુણે, સાતારા, કોલ્હાપુર, સાંગલી, શાહપુર, નગર અને સોલાપુરના વિવિધ વિસ્તારોમાં વીજળી સાથે હળવાથી મધ્યમ વરસાદ થયો હતો. હવામાન વિભાગના જણાવ્યા અનુસાર, બુધવારે પણ આ વિસ્તારોમાં હળવાથી મધ્યમ વરસાદની શક્યતા છે. આગામી બે દિવસ દરમિયાન પશ્ચિમ મહારાષ્ટ્ર અને મરાઠવાડાના કેટલાક ભાગોમાં વીજળીના કડાકા સાથે વરસાદની અપેક્ષા છે; જોકે, વરસાદ તમામ વિસ્તારોમાં વ્યાપક નહીં હોય. હાલમાં બંગાળની ખાડી કે અરબી સમુદ્રમાં કોઈ લો-પ્રેશર (હવાનું ઓછું દબાણ) ક્ષેત્ર તૈયાર થયું નથી; તેથી રાજ્યભરમાં વ્યાપક વરસાદની શક્યતા ઓછી છે. આગામી પાંચ દિવસમાં રાજ્યમાં ભારે કે વ્યાપક વરસાદની કોઈ આગાહી પણ નથી. તમામ જિલ્લાઓમાંથી મરાઠવાડામાં વરસાદની સૌથી વધુ અછત જોવા મળી રહી છે. પરિણામે, રવી પાકની સીઝન દરમિયાન સારા વરસાદની અપેક્ષા ઓછી છે. પુણે વિસ્તારમાં ગાજવીજ સાથે વરસાદની શક્યતા હોવા છતાં, તમામ વિસ્તારોમાં વરસાદ સમાન નહીં હોય.
અમરાવતી જિલ્લામાં સોયાબીનના પાક બાદ હવે કપાસનો પાક પણ નુકસાન થવાનું જોખમમાં છે. વરસાદના અભાવે કપાસમાં જીવાત અને રોગોનો ઉપદ્રવ વધ્યો છે, જેમ કે `લાલ્યા` (પાંદડા લાલ થવા), `કોકડા` (પાંદડાં સુકાઈ જવા), `માહુ` (એફિડ્સ) અને `તુડતુડા` (જૅસિડ્સ). વરસાદની અછતને કારણે કપાસનો વિકાસ અટકી ગયો છે અને ઘણા વિસ્તારોમાં પાક સુકાવા લાગ્યો છે. ખેડૂતોએ થયેલા નુકસાન બદલ પ્રતિ હેક્ટર રૂ. 50,000ના વ્યાપક વળતરની માગ કરી છે.
જળગાંવના ચાલિસગાંવમાં લાંબા સમય સુધી વરસાદ ન પડવાને કારણે અંદાજે 85,000 હૅક્ટર ખરીફ જમીન પરના પાકને અસર થઈ છે. લગભગ દોઢ મહિનાથી વરસાદ ન પડવાને લીધે પડેલી ભારે ગરમીને કારણે પાક સુકાવા લાગ્યો છે. તલેગાંવ રેવન્યુ સર્કલના હીરાપુર, શેવરી, અંધારી, હાટગાંવ, માલશેવગે, બ્રાહ્મણશેવગે અને કરજગાંવ વિસ્તારોમાં સ્થિતિ ખાસ કરીને ગંભીર હોવાનું જાણવા મળ્યું છે. ઘણા ગામોમાં પશુઓના ઘાસચારા અને પાણીની વધતી જતી અછતનો સામનો પણ કરવો પડી રહ્યો છે.
