ગુજરાત: રાજકોટમાં ૧૨ કલાકમાં ૯ વખત ૩.૮ ની તીવ્રતાના ભૂકંપના આંચકા, લોકોમાં ગભરાટ

ગુજરાતના કચ્છ પ્રદેશને સામાન્ય રીતે ભૂકંપની દ્રષ્ટિએ સક્રિય માનવામાં આવે છે, પરંતુ રાજકોટમાં આટલા ટૂંકા ગાળામાં આટલા બધા ભૂકંપ આવવા એ અસામાન્ય વાત છે. આ જ કારણ છે કે આ ઘટના પ્રશાસન અને નિષ્ણાતો માટે ચિંતાનો વિષય બની ગઈ છે.

પ્રતિકાત્મક ફાઇલ તસવીર

ગુજરાતના રાજકોટ જિલ્લામાં બુધવાર રાતથી ગુરુવાર સવાર સુધી સતત ભૂકંપના આંચકા અનુભવાય હોવાથી લોકોમાં ચિંતા અને ભયનો માહોલ સર્જાયો છે. બુધવાર રાત્રે 8 વાગ્યાથી ગુરુવારે સવારે 8 વાગ્યા દરમિયાન કુલ 9 ભૂકંપના આંચકા અનુભવાયા હતા, જેની તીવ્રતા રિક્ટર સ્કેલ પર 2.7 થી 3.8 નોંધાઈ હતી અને કોઈ જાનહાનિ કે મિલકતને નુકસાન ણ થયું હોવાના અહેવાલ છે. છેલ્લા બે દિવસથી વારંવારના આંચકાથી નાગરિકો ચિંતિત થયા છે. અહેવાલ મુજબ પહેલો ભૂકંપ, જેની તીવ્રતા 3.3 હતી, તે બુધવારે રાત્રે 8:43 વાગ્યે આવ્યો હતો. સૌથી મજબૂત ભૂકંપ, જે 3.8 હતો, તે ગુરુવારે સવારે 6:19 વાગ્યે અનુભવાયો હતો. ત્યારબાદના ભૂકંપ લગભગ દર 20-30 મિનિટે આવ્યા, જેની તીવ્રતા 2.7 થી 3.2 સુધી હતી. નોંધનીય છે કે, ચાર ભૂકંપ 3 થી વધુ તીવ્રતાના હતા, જે લોકો સ્પષ્ટપણે અનુભવી શકતા હતા, જેના કારણે ઘણા લોકો ભયભીત થઈને ઘર છોડીને બહાર નીકળ્યા હતા. તમામ ભૂકંપનું કેન્દ્ર ઉપલેટાથી પશ્ચિમ-ઉત્તરપશ્ચિમમાં આશરે 27 થી 30 કિલોમીટર દૂર હોવાનું સામે આવ્યું છે.

કચ્છમાં સૌથી વધુ ભૂકંપના આંચકા અનુભવાય છે.

ગુજરાતના કચ્છ પ્રદેશને સામાન્ય રીતે ભૂકંપની દ્રષ્ટિએ સક્રિય માનવામાં આવે છે, પરંતુ રાજકોટમાં આટલા ટૂંકા ગાળામાં આટલા બધા ભૂકંપ આવવા એ અસામાન્ય વાત છે. આ જ કારણ છે કે આ ઘટના પ્રશાસન અને નિષ્ણાતો માટે ચિંતાનો વિષય બની ગઈ છે. ગાંધીનગર સ્થિત સિસ્મોલોજી સેન્ટરના અધિકારીઓએ માહિતી આપી છે કે 4 થી ઓછી તીવ્રતાના ભૂકંપને સામાન્ય રીતે ખતરનાક માનવામાં આવતા નથી. જોકે, આટલા બધા ભૂકંપનું કારણ નક્કી કરવામાં થોડો સમય લાગી શકે છે. રાજકોટ વિસ્તારમાં હજી સુધી કોઈ જાણીતી ફોલ્ટ લાઇન નથી, અને આવી હિલચાલ સામાન્ય રીતે ભારે ચોમાસા પછી જોવા મળે છે. ભવિષ્યમાં થતા નુકસાનને રોકવા માટે નિષ્ણાતો હાલમાં આ ઘટનાની સંપૂર્ણ તપાસ કરી રહ્યા છે.

કચ્છના રાપર નજીક ધરતીકંપના આંચકા

27 ડિસેમ્બર 2025 ની વહેલી પરોઢે કચ્છની ધરા ધ્રૂજી ઊઠી હતી. રાપરથી દૂર એનું કેન્દ્રબિંદુ નોંધાયું હતું અને ૪.૬ની તીવ્રતાનો ભૂકંપનો આંચકો આવ્યો હતો. એક જ દિવસમાં ભૂકંપની સાથે બીજા બે આફ્ટરશૉક્સ પણ કચ્છવાસીઓએ અનુભવ્યા હતા. વહેલી સવારે સાડાચાર વાગ્યાની આસપાસ ભૂકંપનો આંચકો આવ્યો હતો, જેની તીવ્રતા ૪.૬ની નોંધાઈ હતી. એ પછી સવારે સવાનવ વાગ્યાની આસપાસ ફરી ભૂકંપનો અનુભવ થયો હતો જે ૨.૫ની તીવ્રતાનો હતો. ત્યાર બાદ સવાઅગિયાર વાગ્યે પણ ૩ની તીવ્રતાનો ભૂકંપનો આંચકો નાગરિકોએ અનુભવ્યો હતો. સાઉથ વાગડ ફૉલ્ટ લાઇન અને ગેડી ફૉલ્ટ લાઇનની વચ્ચે નૉર્થ વાગડ ફૉલ્ટ લાઇન પર ભૂકંપના આંચકા આવ્યા હતા. ઘણા લાંબા સમય બાદ કચ્છમાં ૪.૬ની તીવ્રતાનો ભૂકંપ આવ્યો હતો. પરોઢે આવેલા ભૂકંપના કારણે ગેડી ગામ સહિતના વિસ્તારમાં લોકો ઊંઘમાંથી જાગી ગયા હતા અને રાપર સુધી એની અસર વર્તાઈ હતી.