27 October, 2026 07:13 AM IST | Mumbai | Gujarati Mid-day Correspondent
ટ્રેનોનું ટાઇમટેબલ ખોરવાતાં પીક અવર્સ દરમ્યાન છત્રપતિ શિવાજી મહારાજ ટર્મિનસ (CSMT) પર ટ્રેનની રાહ જોઈને ત્રાસેલા પ્રવાસીઓની ભીડ. તસવીર : આશિષ રાજે
મુલુંડ-નાહૂર વચ્ચે લટકતા ઓવરહેડ વાયરને લીધે અને કાંજુરમાર્ગમાં સિગ્નલિંગ કૅબિનમાં આગ લાગવાને પગલે આખો દિવસ ટ્રેન-વ્યવહાર ખોરવાઈ ગયો: સવારે સાડાનવ વાગ્યાની આસપાસ ઊભી થયેલી સમસ્યાને પગલે લોકલ ટ્રેન અને મેલ-એક્સપ્રેસ ટ્રેનોની એકની પાછળ એક લાઇન લાગી, છથી વધુ કલાક સુધી ટ્રેનો એક જગ્યાએ સાવધાન પોઝિશનમાં ઊભી ને ઊભી રહી: આ ધમાલમાં પાટા ક્રૉસ કરતા ત્રણ જણનું લોકલ ટ્રેનની અડફેટે આવીને મૃત્યુ થયું
ભાંડુપની નજીક અને ઘાટકોપર-વિક્રોલી વચ્ચે થયા અૅક્સિડન્ટ
સેન્ટ્રલ રેલવેના લોકલ માર્ગ પર ગઈ કાલે સવારથી જ મોડી રાત સુધી ટ્રેનવ્યવહાર ખોરવાઈ જતાં લાખો મુસાફરોએ ટ્રૅક પર ચાલીને નજીકના રોડ સુધી પહોંચવાની ફરજ પડી હતી. આ ધાંધિયા દરમ્યાન ટ્રૅક ક્રૉસ કરવામાં ૩ મુસાફરોએ ટ્રેનની ટક્કર લાગતાં જીવ ગુમાવ્યો હતો. ભાંડુપ રેલવે-સ્ટેશન નજીક ઍર-કન્ડિશન્ડ (AC) લોકલ ટ્રેનની અડફેટે આવી જતાં ગઈ કાલે બપોરે ૨૧ વર્ષના સાહિલ થિટેનું મૃત્યુ હતું. સાહિલ મુલુંડ કૉલોનીના અમરનગર વિસ્તારનો રહેવાસી હતો અને કૉલેજનો વિદ્યાર્થી હતો. ભાંડુપ સ્ટેશનના પ્લૅટફૉર્મ-નંબર ૪ પરથી પ્લૅટફૉર્મ-નંબર ૩ પર આવતી લોકલ ટ્રેન પકડવા માટે રેલવે-ટ્રૅક ઓળંગી રહેલા સાહિલને ટ્રેને જોરદાર ટક્કર મારી હતી.
મોડી સાંજે ઘાટકોપર-વિક્રોલી વચ્ચે ટ્રૅક ક્રૉસ કરતા બે યુવાનોએ પણ ટ્રેનની અડફેટે આવતાં જીવ ગુમાવ્યો હતો. રાહુલ રાજભર અને ખરબાન રાજભર તરીકે તેમની ઓળખ થઈ હતી.
