બિલ્ડિંગમાં બહારથી આવેલા ત્રણે જણે આગમાં ગુમાવ્યો જીવ

રાજકોટમાં ગઈ કાલે હાઇરાઇઝ બિ​લ્ડિંગમાં લાગેલી આગમાં ત્રણનાં મૃત્યુ, છઠ્ઠા માળે સીડીની લૉબીમાં ફર્નિચરનું કામ ચાલતું હતું એ દરમ્યાન લાગી આગ

પાંચ વેહિકલ સહિત બાવન ફાયર કર્મચારીઓએ આગ ઓલવવાની કામગીરી હાથ ધરીને આગને વધુ ફેલાતાં અટકાવી હતી.

રાજકોટમાં ગઈ કાલે ૧૫૦ ફુટ રિંગ રોડ પર આવેલા ઍટ્લા​ન્ટિસ બિલ્ડિંગમાં આગ લાગવાથી ત્રણ વ્યક્તિનાં મૃત્યુ થયાં હતાં, જ્યારે બે જણ ઈજાગ્રસ્ત થયા હતા. આ ઘટનાને પગલે રાજકોટવાસીઓને ફરી એક વાર ગેમઝોન-કાંડની યાદ આવી ગઈ હતી. જોકે આ ઘટનામાં રાજકોટ ફાયર-બ્રિગેડનો કાફલો તાકીદે ઘટનાસ્થળે ધસી ગયો હતો અને ૩૫ જેટલા લોકોનું રેસ્ક્યુ કરીને કોઈને ટેરેસ પરથી તો કોઈને હાઇડ્રોલિક પ્લૅટફૉર્મ દ્વારા  સહીસલામત નીચે ઉતારી લેતાં મોટી જાનહાનિ ટળી હતી.

બિ​લ્ડિંગમાં શૉર્ટ-સર્કિટને કારણે આગ લાગી હોવાનું પ્રાથમિક અનુમાન છે. આ આગમાં  જે ત્રણ જણે જીવ ગુમાવ્યા તેઓ આ બિલ્ડિંગમાં નહોતા રહેતા.

રાજકોટ ફાયર-બ્રિગેડના ઇન્ચાર્જ ડેપ્યુટી ચીફ ફાયર ઑફિસર અશોકસિંહ ઝાલાએ ‘મિડ-ડે’ને કહ્યું હતું કે ‘૧૧ માળના ઍટ્લા​ન્ટિસ બિ​લ્ડિંગમાં છઠ્ઠા માળે સીડીની લૉબીમાં ફર્નિચરનું કામ ચાલી રહ્યું હતું ત્યાં આગ લાગી હતી. આ આગ આજુબાજુના બે ફ્લૅટમાં સ્પ્રેડ થઈ હતી. જોકે અમને આ ઘટનાની જાણ થતાં તરત જ ઘટનાસ્થળે પહોંચીને અમે બચાવ-કામગીરી હાથ ધરી હતી. પાંચ વેહિકલ સહિત બાવન ફાયર-કર્મચારીઓએ આગ ઓલવવાની કામગીરી હાથ ધરીને આગને વધુ ફેલાતાં અટકાવી હતી અને દોઢ કલાકમાં આગને કાબૂમાં લઈ લીધી હતી. આ દરમ્યાન ત્રણ વ્યક્તિનાં મૃત્યુ થયાં હતાં. આગને કારણે બિ​લ્ડિંગમાં ફસાયેલા ૩૫ જેટલા લોકો પૈકી ઘણાને સીડીમાંથી તો ઘણાને ટેરેસ પરથી બાજુના બિ​લ્ડિંગની ટેરેસ પર શિફ્ટ કર્યા હતા, જ્યારે કેટલાકને હાઇડ્રોલિક પ્લૅટફૉર્મની મદદથી સલામત રીતે નીચે ઉતાર્યા હતા. હાલ ૧૫ વર્ષની એક છોકરી હૉસ્પિટલમાં સારવાર હેઠળ છે.’