22 October, 2026 08:57 AM IST | Mumbai | Gujarati Mid-day Correspondent
પ્રતીકાત્મક તસવીર
પશ્ચિમ બંગાળના બાંકુરા જિલ્લામાં અષ્ટમીની રાત્રે મંગલ ચૌધરી નામના એક માણસે અંધશ્રદ્ધા અને મેલી વિદ્યાથી પ્રેરાઈને તેની ૩૯ વર્ષની પત્ની રૂપા ચૌધરીનું માથું કાપી નાખ્યું હતું અને મંદિરના ત્રિશૂલ પર ચડાવ્યું હતું. પછી તેણે ૬૦ વર્ષના પિતા રાજેન્દ્ર ચૌધરીની તીક્ષ્ણ હથિયારથી હત્યા કરી હતી. આ ઘટના બાદ તે તીક્ષ્ણ હથિયાર સાથે ગામમાં ફરતો જોવા મળ્યો હતો. જોકે ગામવાસીઓ દ્વારા પોલીસને જાણ કરવામાં આવતાં પોલીસે તેની ધરપકડ કરી હતી.
આરોપી મંગલ ચૌધરીએ સૌથી પહેલાં પોતાના હાથની એક આંગળી વાઢી નાખી હતી. પછી પત્ની રૂપા ચૌધરીની ગળું કાપી નાખ્યું હતું અને તેના પિતા રાજેન્દ્ર ચૌધરીની હત્યા કરી હતી. ત્યાર બાદ આરોપીએ તેના ભાઈ પર પણ હુમલો કરવાનો પ્રયાસ કર્યો, પરંતુ ભાઈ ભાગી ગયો અને તેનો જીવ બચાવ્યો હતો.
ગ્રામજનોના જણાવ્યા અનુસાર એક તાંત્રિક વારંવાર આરોપીના ઘરે આવતો હતો, જે શંકા ઊભી કરે છે કે આ હત્યાકાંડ અંધશ્રદ્ધા અને તાંત્રિક પ્રથાઓથી પ્રેરિત હતો.
