રાજ્યને પાણી પૂરું પાડતા ડૅમોમાં પાણીનો સ્ટૉક હવે ૬૦.૩૭ ટકા

માર્ચમાં કાળઝાળ ગરમીને લીધે પાણીના બાષ્પીભવનની પ્રક્રિયા ઝડપી બની

પ્રતીકાત્મક તસવીર

માર્ચ મહિનામાં ગરમી વધવાને કારણે રાજ્યને પાણી પૂરું પાડતા ડૅમોમાં પાણીનું ઝડપથી બાષ્પીભવન થઈ રહ્યું છે અને આગામી ૪ મહિનામાં પાણીપુરવઠામાં મોટો ઘટાડો થવાની શક્યતા રાજ્યના વૉટર રિસોર્સ ડિપાર્ટમેન્ટ દ્વારા વ્યક્ત કરવામાં આવી રહી છે. મહારાષ્ટ્રમાં માર્ચમાં તાપમાન ૪૦ ડિગ્રી સુધી પહોંચી ગયું છે અને હીટવેવને કારણે ડૅમમાંનું પાણી ઝડપથી બાષ્પીભવન થઈ રહ્યું છે. આને કારણે મહારાષ્ટ્રના ૩૦૧૧ નાના-મોટા ડૅમમાં પાણીનો સ્ટૉક ઘટીને ૬૦.૩૭ ટકા થઈ ગયો છે.

ગયા વર્ષે આ જ સમયગાળા દરમ્યાન પાણીનો સંગ્રહ ૫૩.૦૬ ટકા હતો, જ્યારે આ વર્ષે સરખામણીમાં વધુ પાણી છે જેનું એક કારણ કેટલીક જગ્યાએ તાજેતરમાં થયેલો કમોસમી વરસાદ પણ ગણવામાં આવે છે. જોકે બાષ્પીભવનને કારણે હવે પાણીના સ્તરની નિયમિત દેખરેખ જરૂરી છે.

મુંબઈમાં પાણીનો સ્ટૉક

મુંબઈને પાણી પૂરું પાડતા મધ્ય વૈતરણા ડૅમમાં ૪૨.૪૦ ટકા, મોડકસાગરમાં ૫૪.૮૯ ટકા, તાનસામાં ૫૨.૧૩ ટકા અને ભાત્સા ડૅમમાં ૫૯.૧૯ ટકા પાણીનો સ્ટૉક છે. હવામાન વિભાગે વરસાદનું આગમન મોડું થાય એવી આગાહી કરી હોવાથી પાણીની કટોકટી વધુ ચિંતાજનક બની છે.