મુંબઈમાં વાદળછાયા વાતાવરણ વચ્ચે પણ ઉનાળાનો ઉકળાટ યથાવત! પણ શહેરના AQIમાં સુધારો

Mumbai Weather Updates: આજે શહેરમાં વાદળછાયું વાતાવારણ જોવા મળ્યું છે, જોકે વાદળો વચ્ચે પણ મુંબઈગરાં ઉકળાટનો અનુભવ કરી રહ્યાં છે; પરંતુ મુંબઈમાં હવાની એકંદર ગુણવત્તા (AQI) ૨૧ નોંધાઈ છે, જે `ખૂબ જ સારી` શ્રેણીમાં આવે છે

ફાઇલ તસવીર

આજે સવારે મુંબઈ (Mumbai)માં વાદળછાયું વાતાવરણ અને હળવો પવન જોવા મળ્યો હતો, તેમ છતાં ગરમ હવામાન યથાવત રહ્યું હતું. સવારના વહેલા ગાળામાં જ શહેરનું તાપમાન (Mumbai Weather Updates) ૩૨ ડિગ્રી સેલ્સિયસ નોંધાયું હતું. આમ છતાં, વાદળછાયા વાતાવરણ વચ્ચે પણ મુંબઈની હવાની એકંદર ગુણવત્તા (Air Quality Index)માં ઘણો મોટો સુધારો જોવા મળ્યો છે. મુંબઈનો એકંદર એક્યુઆઈ (AQI) ૨૧ નોંધાયો છે, જે `ખૂબ જ સારી` (Good) શ્રેણીમાં આવે છે.

મુંબઈમાં અસહ્ય ગરમી અને ભેજનું પ્રમાણ રહેશે

એક્યુવેધર (AccuWeather)ના અહેવાલ અનુસાર, મુંબઈ, થાણે (Thane) અને નવી મુંબઈ (Navi Mumbai)માં આગામી સમયમાં મુખ્યત્વે સૂર્યપ્રકાશ વાળું હવામાન રહેવાની શક્યતા છે. જોકે, ઉનાળાની આકરી ગરમી અને વાતાવરણમાં ભેજના ઊંચા પ્રમાણને કારણે શહેરીજનોને ભારે અકળામણ અને અગવડતાનો સામનો કરવો પડી શકે છે. મુંબઈ મેટ્રોપોલિટન રીજન (Mumbai Metropolitan Region -  MMR)માં તાપમાન ૨૯ ડિગ્રી સેલ્સિયસથી ૩૫ ડિગ્રી સેલ્સિયસ વચ્ચે રહેવાનું અનુમાન છે.

થાણે સહિત દરિયાકાંઠાના જિલ્લાઓમાં વરસાદની સંભાવના

મુંબઈમાં હવામાન મુખ્યત્વે સૂકું રહેવાની સંભાવના છે. જ્યારે તેના પાડોશી જિલ્લા થાણેમાં આવતીકાલે, ૨૧ મેના રોજ ગાજવીજ સાથે હળવો વરસાદ થઈ શકે છે. થાણે ઉપરાંત મહારાષ્ટ્ર (Maharashtra)ના અન્ય દરિયાકાંઠાના જિલ્લાઓ જેવા કે રાયગઢ (Raigad), રત્નાગિરી (Ratnagiri) અને સિંધુદુર્ગ (Sindhudurg)માં પણ વરસાદ (Mumbai Monsoon) થવાની સંભાવના છે.

મુંબઈમાં પાંચ જૂને થશે ચોમાસાનું આગમન

ગરમી અને અસહ્ય ભેજથી પરેશાન મુંબઈગરાઓ જે ચોમાસાની આતુરતાપૂર્વક રાહ જોઈ રહ્યા છે, તેમના માટે રાહતના સમાચાર આવ્યા છે. ભારતીય હવામાન વિભાગ (India Meteorological Department - IMD)ના જણાવ્યા અનુસાર, જો હવામાનની સ્થિતિ સાનુકૂળ રહેશે તો આ વર્ષે દક્ષિણ-પશ્ચિમ ચોમાસું ૫ કે ૬ જૂનની આસપાસ મુંબઈ (Mumbai Rains) પહોંચવાની સંભાવના છે.

કેરળમાં ૨૬ મેના રોજ ચોમાસું બેસવાની સંભાવના

મુંબઈ પ્રાદેશિક હવામાન વિભાગના નિયામક (Mumbai Meteorological Director) વિક્રમ સિંહ (Bikram Singh)એ જણાવ્યું છે કે, હાલની સ્થિતિ જોતાં ચોમાસું ૨૬ મેની આસપાસ કેરળ (Kerala) પહોંચવાની ધારણા છે.

તેમણે વધુમાં ઉમેર્યું હતું કે, જો ચોમાસાની ગતિ સામાન્ય રહેશે તો વરસાદી સિસ્ટમને કેરળથી મુંબઈ સુધી પહોંચવામાં સામાન્ય રીતે અંદાજે ૧૦ દિવસ જેટલો સમય લાગે છે.

મુંબઈ એક્યુઆઈ (AQI) અપડેટ

બુધવારે સવારે જાહેર કરવામાં આવેલા હવામાનના આંકડા અનુસાર, મુંબઈમાં હવાની ગુણવત્તા `ખૂબ જ સારી` (Good) શ્રેણીમાં નોંધાઈ છે અને શહેરનો એકંદર એર ક્વોલિટી ઈન્ડેક્સ (AQI) ૨૧ રહ્યો છે. આ સુધારો છેલ્લા કેટલાક અઠવાડિયાથી ચાલી રહેલા હકારાત્મક ટ્રેન્ડને દર્શાવે છે, જે દરમિયાન શહેરમાં મોટાભાગે હવાની ગુણવત્તા `ખૂબ જ સારી` થી `મધ્યમ` શ્રેણી વચ્ચે રહી છે.

વિસ્તાર મુજબ હવાની સ્થિતિ:

• સૌથી સ્વચ્છ વિસ્તાર: મુંબઈમાં સૌથી શ્રેષ્ઠ અને સ્વચ્છ હવાની ગુણવત્તા `મુલગાંવ સ્ટેશન ૨` ખાતે નોંધાઈ હતી, જ્યાં એક્યુઆઈ (AQI) માત્ર ૫ રહ્યો હતો.

• સૌથી વધુ પ્રદૂષિત વિસ્તાર: બીજી તરફ, સૌથી ખરાબ સ્થિતિ `મિરાશી નગર` માં જોવા મળી હતી, જ્યાં એક્યુઆઈનો આંકડો વધીને ૨૧૦ પર પહોંચી ગયો હતો. આ સ્તર હવાની ગુણવત્તાને `બિનઆરોગ્યપ્રદ` (Unhealthy) શ્રેણીમાં મૂકે છે.

મુંબઈના અન્ય વિસ્તારો જ્યાં હવાની ગુણવત્તા `ખૂબ જ સારી` નોંધાઈ:

• ગામદેવી સ્ટેશન ૧: ૮

• ધાકોજી સેઠપાડા: ૧૦

• પ્રભાદેવી: ૧૦

• બાંદ્રા વેસ્ટ સ્ટેશન ૧: ૧૨

• વિદ્યા નગરી: ૧૨

• દહિસર: ૧૩

• સાંતાક્રુઝ વેસ્ટ: ૧૩

• ચારકોપ સ્ટેશન ૨: ૧૭

• જુહુ: ૧૮

• કોલાબા: ૧૯

• વિલે પાર્લે વેસ્ટ: ૨૦

• સાકી નાકા: ૨૨

• બીકેસી: ૨૩