24 April, 2026 12:24 PM IST | Nandurbar | Gujarati Mid-day Online Correspondent
પ્રતીકાત્મક તસવીર
મહારાષ્ટ્ર (Maharashtra)ના નંદુરબાર (Nandurbar)માં જિલ્લામાંથી એક ચોંકાવનારી ઘટના સામે આવી છે, જેમાં એક વ્યક્તિએ તેની પત્ની પરના ગુસ્સામાં આખું સાસરું સળગાવી દીધું (Nandurbar fire incident) હતું. આ ઘટનામાં માત્ર તેના સાસરિયાનું ઘર જ નહીં, પરંતુ આગની ઝપેટમાં આવતા પાડોશીનું ઘર પણ સંપૂર્ણપણે બળીને ખાખ થઈ ગયું હતું.
મહારાષ્ટ્રના નંદુરબાર જિલ્લામાં એક માથાભારે પતિની કરતૂત સામે આવી છે, જેમાં પત્નીએ પિયરથી પરત આવવાની ના પાડતા તેણે સાસરીના ઘરમાં આગ લગાવી દીધી હતી.
ઘટનાની વિગતો મુજબ, આરોપી મિથુન પડવીનો તેની પત્ની સાથે છેલ્લા કેટલાક સમયથી વિવાદ ચાલી રહ્યો હતો. આ ઝઘડાને કારણે પત્ની પિયર જતી રહી હતી અને ત્યાં જ રહેતી હતી. પત્ની પિયરથી પરત ન ફરતા ઉશ્કેરાયેલા પતિએ આ આઘાતજનક પગલું ભર્યું હતું.
પતિ દ્વારા વારંવાર બોલાવવામાં આવ્યા હોવા છતાં પત્ની તેના ઘરે પરત આવી ન હતી. જ્યારે સાસરિયાઓએ પણ તેને મોકલવાની ના પાડી દીધી, ત્યારે આરોપીએ અત્યંત ગુસ્સામાં આવીને સાસરીના ઘરને આગ ચાંપી દીધી હતી.
ગરમી અને તેજ પવનને કારણે આગ એટલી વિકરાળ બની ગઈ હતી કે તેણે પાડોશના અન્ય એક ઘરને પણ પોતાની ઝપેટમાં લઈ લીધું હતું.
જોકે, સારી વાત એ રહી કે આ ઘટનામાં કોઈ જાનહાનિ થઈ નથી, પરંતુ બંને ઘરો સંપૂર્ણપણે બળીને ખાખ થઈ ગયા છે.
જ્યારે ઘરમાં આગ લાગી ત્યારે પરિવારના સભ્યો જીવ બચાવવા માટે બહાર દોડી આવ્યા હતા. જોકે, પરિવારોને મોટું આર્થિક નુકસાન વેઠવાનો વારો આવ્યો છે
હાલમાં પોલીસે આ મામલે ગુનો નોંધીને ફરાર આરોપીની શોધખોળ શરૂ કરી છે.
અહેવાલ મુજબ, ઘટનાસ્થળે આગ લગાવ્યા બાદ આરોપી મિથુન પડવી તરત જ ત્યાંથી ફરાર થઈ ગયો હતો. તેની સાસુ દ્વારા નોંધાવવામાં આવેલી ફરિયાદના આધારે પોલીસે ગુનો નોંધીને આરોપીની શોધખોળ હાથ ધરી છે.
આ ભયાનક ઘટનાનો એક વીડિયો પણ સામે આવ્યો છે, જેમાં જોઈ શકાય છે કે સ્થાનિક લોકો અને અન્ય લોકો લાગેલી વિકરાળ આગને બુઝાવવાનો પ્રયાસ કરી રહ્યા હતા. જોકે, લોકોના ભારે પ્રયત્નો છતાં આગ પર કાબૂ મેળવી શકાયો નહોતો અને બંને ઘરો સંપૂર્ણપણે બળીને નાશ પામ્યા હતા.
પોલીસે આ મામલે વિવિધ પાસાઓ પર તપાસ તેજ કરી છે.
આ ઘટનાએ ફરી એકવાર ઘરેલું વિવાદોના ખતરનાક સ્વરૂપને ઉજાગર કર્યું છે, જેમાં ગુસ્સામાં લેવાયેલું એક પગલું અનેક લોકો માટે ભારે નુકસાનનું કારણ બની શકે છે.
તંત્ર દ્વારા લોકોને અપીલ કરવામાં આવી છે કે આવા વિવાદોને શાંતિપૂર્ણ રીતે ઉકેલવામાં આવે, જેથી આ પ્રકારની ઘટનાઓને રોકી શકાય અને કોઈના જાન-માલને નુકસાન ન પહોંચે.
