કલ્યાણમાં એક વર્ષની બાળકી ગળી ગઈ હેરપિન

ડૉક્ટરોએ લેપ્રોસ્કોપિક ટેક્નિકથી પિન કાઢીને તેનો જીવ બચાવ્યો

પ્રતીકાત્મક તસવીર (તસવીર સૌજન્યઃ એઆઇ)

કલ્યાણમાં ડૉક્ટરોની ત્વરિત સૂઝબૂઝ અને કુશળતાને કારણે એક વર્ષની માસૂમ બાળકીને નવું જીવન મળ્યું છે. રમતાં-રમતાં આ બાળકીના ગળામાં અણીદાર હેરપિન ફસાઈ ગઈ હતી, જે તેના જીવ માટે જોખમી સાબિત થઈ શકતી હતી.

કલ્યાણ-ઈસ્ટમાં કાકા ઢાબા પાસે રહેતા વિશ્વકર્મા પરિવારની એક વર્ષની બાળકી પ્રજ્ઞા ઘરે રમી રહી હતી. આ દરમ્યાન તેણે અચાનક એક અણીદાર હેરપિન મોઢામાં નાખી દીધી હતી, જે તેના ગળામાં ઊતરી ગઈ હતી. પિન ફસાઈ જવાને કારણે બાળકીને શ્વાસ લેવામાં તકલીફ થવા લાગી હતી જેનાથી પરિવાર ગભરાઈ ગયો હતો.

પરિવારજનો તાત્કાલિક બાળકીને સારવાર માટે સ્થાનિક જાનકી ગ્લોબલ હૉસ્પિટલમાં લઈ ગયા હતા. ત્યાં એક્સ-રે તપાસમાં જાણવા મળ્યું કે હેરપિન ગળામાં અત્યંત જોખમી રીતે ફસાયેલી છે. જો એને સમયસર કાઢવામાં ન આવી હોત તો બાળકીના જીવને ગંભીર જોખમ થઈ શકતું હતું. પરિસ્થિતિની ગંભીરતાને જોઈ ડૉક્ટરોએ લેપ્રોસ્કોપિક ટેક્નિકની મદદ વડે ગળામાં ફસાયેલી પિન સફળતાપૂર્વક બહાર કાઢી હતી. હાલ બાળકીની તબિયત સુધારા પર છે.