મુંબઈમાં માત્ર પાંચ દિવસમાં ફટાકડાએ ૩૩૩ આગ લગાડી

૯ અને ૧૦ નવેમ્બરે જ આગના ૨૬૮ બનાવ: બે દિવસમાં એક વ્યક્તિનું મૃત્યુ અને બે ઘાયલ; ગોરેગામથી દહિસર વચ્ચે સૌથી વધુ ૯૩ કૉલ

પ્રતીકાત્મક તસવીર

મુંબઈમાં રૉકેટ અને આકાશી આતશબાજી પર પ્રતિબંધ હોવા છતાં દિવાળીના તહેવાર દરમ્યાન આગની ઘટનાઓમાં ભારે ઉછાળો જોવા મળ્યો છે. ૬ નવેમ્બરથી ૧૦ નવેમ્બર દરમ્યાન માત્ર પાંચ દિવસમાં મુંબઈ ફાયરબ્રિગેડને આગ સંબંધિત ૪૯૯ કૉલ મળ્યા હતા જેમાંથી દર ત્રણમાંથી બે એટલે કે ૩૩૩ બનાવ માત્ર ફટાકડાના કારણે બન્યા હતા.

શહેરમાં ૯ અને ૧૦ નવેમ્બર દરમ્યાન જ આગની ૨૬૮ ઘટનાઓ બની હતી જેમાંથી ૧૬૮ બનાવ ફટાકડાને લીધે થયા હતા. ૯ નવેમ્બરે પરિસ્થિતિ વધુ ગંભીર બની હતી, જ્યારે શહેરમાં આગના ૧૬૬ બનાવ નોંધાયા હતા અને એમાંથી ૧૪૪ બનાવ ફટાકડા સળગાવવાના કારણે બન્યા હતા. આ સિવાય ૧૦ નવેમ્બરે પણ આગની ૧૦૨ ઘટનાઓ બની હતી જેમાં ૨૪ કિસ્સામાં ફટાકડા કારણભૂત હતા. આ બે દિવસમાં મલાડમાં એક કિશોરે જીવ ગુમાવ્યો હતો, જ્યારે અન્ય બે વ્યક્તિ ઘાયલ થઈ હતી.