માટુંગામાં થયેલા ઍક્સિડન્ટમાં ડૉન બૉસ્કો સ્કૂલનો છઠ્ઠા ધોરણમાં ભણતો સ્ટુડન્ટ અને તેના પિતા ઘાયલ

પપ્પાની ઈજાઓ ગંભીર જણાતાં તેમને ઇન્ટેન્સિવ કૅર યુનિટમાં દાખલ કરીને સારવાર આપવામાં આવી રહી હતી, જ્યારે શાર્થિકને કૅઝ્યુઅલ્ટી વૉર્ડમાં સારવાર અપાઈ રહી હતી.

પ્રતીકાત્મક તસવીર

માટુંગાની ડૉન બૉસ્કો સ્કૂલના છઠ્ઠા ધોરણમાં ભણતો શાર્થિક ચવાણ ગઈ કાલે તેના પપ્પા સાથે સ્કૂટર પાછો ફરી રહ્યો હતો ત્યારે તેમના સ્કૂટરનો અકસ્માત થયો હતો જેમાં બન્ને જણ ઘાયલ થયા હતા.
ગઈ કાલે શાર્થિકની એક્ઝામ હતી. એ પતાવ્યા બાદ તેના પપ્પા તેને લેવા સ્કૂલમાં ગયા હતા. તેઓ સ્કૂટર પર દાદર હિન્દુ કૉલોની પાછા ફરી રહ્યા હતા ત્યારે ડૉક્ટર બાબાસાહેબ આંબેડકર રોડ પર કપોળ નિવાસ સામે પાર્ક કરેલી ટૅક્સી સાથે તેમના સ્કૂટરની ટક્કર થઈ હતી. શાર્થિકના પપ્પાએ હેલ્મેટ પહેરી હતી છતાં તેમને મોં પર ઈજા થઈ હતી, જ્યારે શાર્થિકને પણ માથામાં અને પગમાં ઈજા થઈ હતી. હાલ કપોળ નિવાસમાં કન્સ્ટ્રકશનનું કામ ચાલી રહ્યું છે. એનો વૉચમૅન નાસિર શેખ સ્કૂટરનો ઍક્સિડન્ટ થયેલો જોઈને તરત જ દોડ્યો હતો. શાર્થિકના આઇડેન્ટિટી કાર્ડ પરથી ઇમર્જન્સી નંબર જોઈને તરત જ તેની મમ્મી પૂજાને ફોન કરીને ઘટનાની જાણ કરી હતી અને સાથે પોલીસને પણ જાણ કરી હતી તથા ઍમ્બ્યુલન્સ માટે પણ કૉલ કર્યો હતો. જોકે એ પછી પણ ઍમ્બ્યુલન્સ સમસયર ન આવતાં આખરે નાની ઍમ્બ્યુલન્સમાં તે બન્નેને સાયન હૉસ્પિટલમાં લઈ જવાયા હતા. શાર્થિકના પપ્પાની ઈજાઓ ગંભીર જણાતાં તેમને ઇન્ટેન્સિવ કૅર યુનિટમાં દાખલ કરીને સારવાર આપવામાં આવી રહી હતી, જ્યારે શાર્થિકને કૅઝ્યુઅલ્ટી વૉર્ડમાં સારવાર અપાઈ રહી હતી.