India vs Japa Cricket: ક્રિકેટ ઇતિહાસમાં પહેલી વાર ભારત અને જાપાન વચ્ચે મુકાબલો

ભારત અને જાપાન વચ્ચેની આ એકમાત્ર T20 મૅચને સુઝુકી કપ નામ આપવામાં આવ્યું છે. તે 22 સપ્ટેમ્બરે જાપાનના તોચીગી પ્રીફેક્ચરમાં સાનો ઇન્ટરનેશનલ ક્રિકેટ ગ્રાઉન્ડ ખાતે રમાશે. આ મૅચ ભારતીય સમય પ્રમાણે સવારે 9:30 વાગ્યે શરૂ થવાની છે.

ભારતીય ક્રિકેટ ટીમ (ફાઇલ તસવીર)

અફઘાનિસ્તાન સામેની T20 સિરીઝ બાદ, ભારતીય ક્રિકેટ ટીમ 2026 એશિયન ગેમ્સમાં ભાગ લેવા માટે તૈયાર છે. એશિયન ગેમ્સ પહેલા, ભારતીય ટીમ જાપાન સામે T20 મૅચ રમશે. આ ભારત અને જાપાનની પુરુષ ટીમો વચ્ચેનો પહેલો આંતરરાષ્ટ્રીય ક્રિકેટ મુકાબલો હશે. BCCI અને જાપાન ક્રિકેટ એસોસિએશને 4 સપ્ટેમ્બરે સત્તાવાર રીતે મૅચની જાહેરાત કરી. આ પહેલી વાર હશે જ્યારે બન્ને દેશોની સિનિયર પુરુષ ટીમો એકબીજા સામે ટકરાશે.

22 સપ્ટેમ્બરે મેચનું આયોજન

ભારત અને જાપાન વચ્ચેની આ એકમાત્ર T20 મૅચને સુઝુકી કપ નામ આપવામાં આવ્યું છે. તે 22 સપ્ટેમ્બરે જાપાનના તોચીગી પ્રીફેક્ચરમાં સાનો ઇન્ટરનેશનલ ક્રિકેટ ગ્રાઉન્ડ ખાતે રમાશે. આ મૅચ ભારતીય સમય પ્રમાણે સવારે 9:30 વાગ્યે શરૂ થવાની છે. ભારત અને જાપાન વચ્ચેના રાજદ્વારી સંબંધોની 75મી વર્ષગાંઠની ઉજવણી માટે તેનું આયોજન કરવામાં આવી રહ્યું છે. બન્ને દેશો આ વર્ષે દ્વિપક્ષીય સંબંધોના 75 વર્ષની ઉજવણી કરી રહ્યા છે, અને આ T20 મૅચનું આયોજન આ સીમાચિહ્નરૂપ ઉજવણીના ભાગ રૂપે કરવામાં આવી રહ્યું છે.

શ્રેયસ ઐયર હશે ભારતનો કૅપ્ટન

શ્રેયસ ઐયર ભારતીય ટીમનું નેતૃત્વ કરશે. 2026 એશિયન ગેમ્સ માટે BCCI દ્વારા જાહેર કરાયેલી ટીમ જાપાન સામે મેદાનમાં ઉતરશે. જ્યારે ભારત અને જાપાનની ટીમો અગાઉ અંડર-19 વર્લ્ડ કપમાં એકબીજાનો સામનો કરી ચૂકી છે, ત્યારે સિનિયર પુરુષ સ્તરે આ બન્ને દેશો વચ્ચેનો આ પહેલી આંતરરાષ્ટ્રીય મૅચ હશે.

એશિયન ગેમ્સ પહેલાનો મહત્ત્વપૂર્ણ મુકાબલો

ભારત 2026 એશિયન ગેમ્સમાં પોતાના સુવર્ણ ચંદ્રકનો બચાવ કરવાનો પ્રયાસ કરશે. એશિયન ગેમ્સમાં ભારતીય ટીમનો પહેલો મુકાબલો 28 સપ્ટેમ્બરના રોજ યોજાવાનો છે. જાપાન સામેની મૅચ એશિયન ગેમ્સ પહેલા બંને ટીમો માટે તૈયારીની તક તરીકે પણ કામ કરશે. તે સ્પોર્ટ્સ 75 પહેલનો એક ભાગ છે, જે બંને દેશો વચ્ચે વધુ રમતગમત સહયોગને પ્રોત્સાહન આપવા માટે શરૂ કરવામાં આવી છે. આ પહેલ પ્રધાનમંત્રી નરેન્દ્ર મોદી અને જાપાનના પ્રધાનમંત્રી સના તાકાચી વચ્ચેની મુલાકાત દરમિયાન શરૂ કરવામાં આવી હતી. સુઝુકી કપ હેઠળ આયોજિત મેચ આ જ પહેલ સાથે જોડાયેલી છે.

જપાનમાં ક્રિકેટ-સુવિધાઓથી BCCI નાખુશ, એશિયન ગેમ્સ માટે B ટીમ મોકલી શકે

એશિયન ગેમ્સ 19 સપ્ટેમ્બરથી જપાનના આઇચી-નાગોયામાં શરૂ થવાની છે. પુરુષોની ક્રિકેટ ટુર્નામેન્ટ 24 સપ્ટેમ્બરથી 3 ઑક્ટોબર દરમ્યાન અને મહિલા ટુર્નામેન્ટ 17 સપ્ટેમ્બરથી બાવીસ સપ્ટેમ્બર દરમ્યાન યોજાવાની છે. જોકે ઇવેન્ટનાં ત્રણ અઠવાડિયાં પહેલાં જપાનમાં ક્રિકેટ-સુવિધાઓ પર સવાલ ઊભા થયા છે. ભારત, પાકિસ્તાન, બંગલાદેશ સહિત એશિયન ક્રિકેટ કાઉન્સિલ જપાનમાં ક્રિકેટ-સુવિધાઓની વ્યવસ્થા અને સુવિધાઓથી અસંતુષ્ટ છે. ક્રિકેટની રમતો કોરોગી સ્પોર્ટ્‍સ પાર્કમાં રમાશે જે પહેલાં બેઝબૉલ ગ્રાઉન્ડ હતું. પિચ અને તંબુવાળા ડ્રેસિંગ રૂમ પણ ઇન્ટરનૅશનલ સ્તરનાં નથી. વધુમાં હોટેલના રૂમ ખૂબ નાના છે. અહેવાલ અનુસાર સુવિધાના અભાવને કારણે ભારતીય ક્રિકેટ બોર્ડ પોતાની B ટીમ મોકલી શકે છે. આ નિર્ણય લેતાં પહેલાં બોર્ડ ત્યાં એક નિરીક્ષક મોકલશે. નિરીક્ષક રિપોર્ટ સબમિટ કરશે અને જો વ્યવસ્થાઓ યોગ્ય ન હોય તો B ટીમ મોકલવાનું વિચાર કરવામાં આવી શકે છે. શ્રેયસ ઐયરની આગેવાનીમાં પહેલાંથી એશિયન ગેમ્સ માટે ભારતીય સ્ક્વૉડ જાહેર કરવામાં આવી છે.