મહારાષ્ટ્ર પોલીસની પ્રયાગરાજમાં મોટી કાર્યવાહી! ડ્રગ્સ ફેક્ટરીમાંથી ૧૪૦ કરોડનો માલ જપ્ત, ૨૧ની ધરપકડ

Maharashtra Police bust Prayagraj drug factory: મહારાષ્ટ્ર પોલીસે પ્રયાગરાજમાં ચાલતી ડ્રગ્સ ફેક્ટરીનો પર્દાફાશ કર્યો; રુપિયા ૧૪૦ કરોડનો માલ જપ્ત, ચાર રાજ્યોમાંથી ૨૧ લોકોની ધરપકડ; તપાસમાં વિદેશી નેટવર્ક સાથેના તાર જોડાયેલા હોવાની મળી માહિતી

પ્રતીકાત્મક ફાઇલ તસવીર

ઉત્તર પ્રદેશ (Uttar  Pradesh)ના પ્રયાગરાજ (Prayagraj)માં મહારાષ્ટ્ર (Maharashtra)ની મીરા રોડ પોલીસે (Mira Road Police) ડ્રગ તસ્કરો સામે મોટી કાર્યવાહી હાથ ધરી છે. મીરા-ભાઈંદર, વસઈ-વિરાર (MBVV) પોલીસ ક્રાઈમ બ્રાન્ચે પ્રયાગરાજમાં ડ્રગ્સ બનાવતી એક મોટી ફેક્ટરીનો પર્દાફાશ કરીને તેને બંધ કરાવી દીધી છે.

આંતરરાજ્ય ગેરકાયદેસર ડ્રગ્સ નેટવર્ક સામેની એક મોટી કાર્યવાહીમાં, મીરા-ભાઈંદર, વસઈ-વિરાર (MBVV) પોલીસ ક્રાઈમ બ્રાન્ચે ઉત્તર પ્રદેશના પ્રયાગરાજમાં કાર્યરત મેફેડ્રોન (MD) ડ્રગ્સ બનાવવાની એક વિશાળ ફેક્ટરીનો પર્દાફાશ કર્યો છે. પોલીસ અધિકારીઓએ પુષ્ટિ કરી છે કે ચાર રાજ્યોમાંથી ૨૧ શંકાસ્પદ આરોપીઓની ધરપકડ કરવામાં આવી છે (Maharashtra Police bust Prayagraj drug factory) અને ઉત્પાદિત નશાકારક પદાર્થો, કાચો રસાયણિક જથ્થો તથા લેબોરેટરીના સાધનો સહિત કુલ રુપિયા ૧૪૦ કરોડનો મુદ્દામાલ જપ્ત કરવામાં આવ્યો છે.

નાલાસોપારાના નાના દરોડાથી આંતરરાજ્ય નેટવર્કનો પર્દાફાશ થયો

આ વ્યાપક કામગીરીની શરૂઆત પાલઘર (Palghar) જિલ્લામાં થયેલી એક નાની સ્થાનિક ડ્રગ્સ જપ્તીથી થઈ હતી. ૨૪ જૂને ક્રાઈમ બ્રાન્ચના અધિકારીઓએ નાલાસોપારામાંથી બે વ્યક્તિઓની ધરપકડ કરી હતી અને તેમની પાસેથી રુપિયા ૩.૩૬ લાખની કિંમતનું ૧૧૨ ગ્રામ એમડી ડ્રગ્સ કબજે કર્યું હતું. ત્યારબાદ હાથ ધરાયેલી પૂછપરછ અને ટેકનિકલ ઈન્ટેલિજન્સના આધારે તપાસકર્તાઓ મુંબઈ, કલ્યાણ, નેરુલ, જળગાંવ, ગુજરાત અને ઉત્તર પ્રદેશ જેવા અનેક કેન્દ્રો સુધી પહોંચ્યા હતા, જ્યાંથી એક અત્યાધુનિક વિતરણ અને ઉત્પાદન નેટવર્ક સામે આવ્યું હતું.

ક્રાઈમ બ્રાન્ચ યુનિટ-૪ ની વિશેષ ટીમોએ સપ્લાય ચેઈનને ટ્રેક કરીને પ્રયાગરાજમાં ભાડે રાખેલી કૃષિ જમીન પર બનાવેલા ટીન શેડ સુધી પહોંચવામાં સફળતા મેળવી હતી, જ્યાં આ ગેંગ છૂપી રીતે કેમિકલ પ્રોસેસિંગ યુનિટ ચલાવતી હતી. આ ફેક્ટરી પર પાડવામાં આવેલા દરોડા દરમિયાન પોલીસે ૫૨.૯૩ કિલો શુદ્ધ એમડી ડ્રગ્સની સાથે ૨૬૦ લીટર જરૂરી કેમિકલ (જેમાં મોનોમિથાઈલએમાઈન, હાઈડ્રોક્લોરિક એસિડ અને ક્લોરોફોર્મ સામેલ છે) અને ઉચ્ચ ગુણવત્તાના લેબોરેટરીના સાધનો જપ્ત કર્યા હતા. તમામ દરોડાના સ્થળોએથી કાયદા અમલીકરણ એજન્સીઓએ કુલ ૬૯.૭૫ કિલો એમડી ડ્રગ્સ જપ્ત કર્યું છે.

ઉચ્ચ શિક્ષિત ઓપરેટરો અને ગેંગ કનેક્શન બહાર આવ્યા

પત્રકારોને સંબોધતા MBVV પોલીસ કમિશનરનિકેત કૌશિકે ખુલાસો કર્યો હતો કે આ સિન્ડિકેટમાં આશ્ચર્યજનક રીતે ખૂબ જ ઉચ્ચ શિક્ષિત વ્યક્તિઓ સામેલ હતી, જેમાં યુનિવર્સિટીના ગ્રેજ્યુએટ્સ અને એક પ્રશિક્ષિત એન્જિનિયરનો સમાવેશ થાય છે જે રાસાયણિક સંશ્લેષણ (કેમિકલ સિન્થેસિસ) પ્રક્રિયાની દેખરેખ રાખતો હતો.

તપાસમાં જાણીતી ગુનાહિત ગેંગ્સ સાથેના સંબંધો પણ પ્રકાશમાં આવ્યા છે, ખાસ કરીને કલ્યાણ સ્થિત કુખ્યાત `જાલીમ ગેંગ` સાથેના તાર જોડાઈ રહ્યા છે. કમિશનર કૌશિકે જણાવ્યું હતું કે, ‘ધરપકડ કરાયેલા આ ૨૧ આરોપીઓ અંગે ચિંતાનો વિષય કલ્યાણની કુખ્યાત ગુનાહિત ગેંગ `જાલીમ ગેંગ`ની પ્રત્યક્ષ સંડોવણી છે. ધરપકડ કરાયેલા વ્યક્તિઓમાંથી એક સામે હત્યા અને વસૂલી સહિતના ગંભીર ગુનાહિત કેસો નોંધાયેલા છે. ૨૧ માંથી બે ગુનેગારો જાલીમ ગેંગ સાથે જોડાયેલા છે.’

આંતરરાષ્ટ્રીય કનેક્શન અંગે તપાસ ચાલુ

સત્તાવાળાઓએ પુષ્ટિ કરી છે કે ધરપકડ કરાયેલા ૨૧ વ્યક્તિઓએ આ સિન્ડિકેટમાં કાચું કેમિકલ મેળવવા અને ડ્રગ્સ બનાવવા થી લઈને હવાલા આધારિત નાણાકીય વ્યવહારો અને પ્રાદેશિક વિતરણનું સંચાલન કરવા સુધીની વિવિધ ભૂમિકાઓ ભજવી હતી.

MBVV પોલીસ ક્રાઈમ બ્રાન્ચ હવે આ સિન્ડિકેટે વિદેશમાં નશાકારક પદાર્થોની નિકાસ કરી છે કે નહીં તે નિર્ધારિત કરવા માટે સંભવિત આંતરરાષ્ટ્રીય કનેક્શનની તપાસ કરી રહી છે. આ ઓપરેશન દ્વારા ઊભા કરાયેલા ગુનાહિત નાણાંની ભાળ મેળવવા અને તેને સીઝ કરવા માટે તમામ ૨૧ આરોપીઓના નાણાકીય ઓડિટ અને સંપત્તિની ચકાસણી હાલ ચાલી રહી છે.