23 October, 2026 08:53 AM IST | Mumbai | Gujarati Mid-day Correspondent
મુખ્ય પ્રધાન પાસે તપાસની ડિમાન્ડ સાથે પહોંચ્યા શિવસૈનિકો
BJPના વિધાનસભ્ય તથા સરકારના મિનિસ્ટર આશિષ શેલારે ઉદય સામંત તથા મનોજ જરાંગે દ્વારા કરવામાં આવેલા દાવાઓને ફગાવતાં કહ્યું હતું કે ‘એકનાથ શિંદે સામે સવાલ ઊભો કરવામાં આવી રહ્યો છે એ અમને માન્ય નથી. મનોજ જરાંગેની ઑડિયો-ક્લિપ બાબતે પણ અમે અસંમત છીએ. આ આખા મામલાની ઝીણવટપૂર્વક તપાસ કરવામાં આવવી જોઈએ એવી અમારી માગણી છે. જે ક્લિપનો કોઈ આધાર નથી, એ ખરી છે કે નહીં એ સ્પષ્ટ નથી અને જેની તપાસ પણ નથી થઈ એવી ક્લિપને કારણે જો ઉદય સામંતને ગેરસમજ થઈ હોય તો અમે તેમની ગેરસમજ દૂર કરવા માટે તૈયાર છીએ. એકનાથ શિંદે અમારા નેતા છે અને અમારા નાયબ મુખ્ય પ્રધાન છે. જો તેમના વિશે કોઈ શંકા ઊભી કરશે તો એ અમને માન્ય નથી. ઑડિયો-ક્લિપમાં કરવામાં આવેલો દાવો ૧૦૦ ટકા ખોટો છે.’
શિવસેનાના સંસદસભ્ય નરેશ મ્હસ્કેએ પણ આ પ્રકરણે પોતાની પ્રતિક્રિયા આપી હતી અને કહ્યું હતું કે ‘મનોજ જરાંગેએ આ ઑડિયો-ક્લિપ તપાસ માટે પોલીસ ડિપાર્ટમેન્ટના સાઇબર સેલને આપવી જોઈએ. ત્યાર પછી મનોજ જરાંગે અને શિવસેના વચ્ચે આગ લગાવવાનું કામ કોણ કરી રહ્યું છે એ સામે આવશે. ઑડિયો-ક્લિપ સાચી છે કે નહીં એ જણાયા પછી સત્ય સામે આવશે. મનોજ જરાંગેએ અકારણ નાયબ મુખ્ય પ્રધાન એકનાથ શિંદેની ટીકા કરવી ન જોઈએ. આ આખા વિવાદની પાછળ કોણ છે એ જાણવું જરૂરી છે. અમે મુખ્ય પ્રધાનને પણ આ મુદ્દે ફરિયાદ કરવા મળીશું.’
BJPના મહારાષ્ટ્રના મુખ્ય પ્રવક્તા નવનાથ બને આ ક્લિપ વિશે જણાવ્યું હતું કે ‘આજકાલ આર્ટિફિશ્યલ ઇન્ટેલિજન્સ (AI) દ્વારા નકલી ઑડિયો અને વિડિયો-ક્લિપ બનાવવામાં આવે છે. એવામાં મનોજ જરાંગેએ સંભળાવેલી ક્લિપની સ્પેશ્યલ ઇન્વેસ્ટિગેશન ટીમ (SIT) દ્વારા તપાસ કરવામાં આવવી જોઈએ. આની સઘન તપાસ થઈને સત્ય સામે આવવું જોઈએ. AIના કારણે કયો ઑડિયો-વિડિયો સાચો છે અને કયો નકલી એમાં તફાવત શોધી કાઢવો ખૂબ જ મુશ્કેલ બન્યું છે.’
મનોજ જરાંગે દ્વારા મીડિયા સમક્ષ જાહેર કરવામાં આવેલી ઑડિયો-ક્લિપના મુદ્દે ઊભા થયેલા વિવાદ બાદ શિવસેનાનું પ્રતિનિધિમંડળ ગુરુવારે રાત્રે મુખ્ય પ્રધાન દેવેન્દ્ર ફડણવીસના સત્તાવાર નિવાસસ્થાન વર્ષા બંગલામાં તેમને મળ્યું હતું. પ્રતિનિધિમંડળે આ ઑડિયો-ક્લિપના પ્રકરણની તપાસ કરવાની સત્તાવાર રીતે અરજી કરી હતી. મુખ્ય પ્રધાનને મળવા ગયેલા પ્રતિનિધિમંડળમાં વિધાન-પરિષદના ડેપ્યુટી ચૅરપર્સન સચિન અહિર, સંસદસભ્ય મિલિંદ દેવરા, સંસદસભ્ય રવીન્દ્ર વાયકર, વિધાનસભ્ય હેમંત પાટીલ, શિવસેનાના જનરલ સેક્રેટરી તથા ભૂતપૂર્વ સંસદસભ્ય રાહુલ શેવાળે તથા ભૂતપૂર્વ કૅબિનેટ પ્રધાન ડૉ. દીપક સાવંત હતા.
