મુંબઈના માલવણીમાં રામ નવમીની શોભાયાત્રા પહેલા વિવાદ, મસ્જિદ સામે કેસરી ધ્વજ…

ઘટના પછી, હિન્દુ જૂથના સભ્યોએ આરોપ લગાવ્યો કે પોલીસે તેમની સાથે કઠોર વર્તન કર્યું અને ઘણા લોકોની અટકાયત કરી. તેમણે વધુમાં દાવો કર્યો કે જેઓને અટકાયતમાં લેવામાં આવ્યા હતા તેમની સાથે દુર્વ્યવહાર કરવામાં આવ્યો હતો. જોકે, પછીથી બધાને છોડી દેવામાં આવ્યા.

વાયરલ વીડિયોમાંથી સ્ક્રીન શૉટ (તસવીર: સોશિયલ મીડિયા)

રામ નવમીમાં ધ્વજ ફરકાવવાને લઈને બે સમુદાય વચ્ચે થયેલા વિવાદ બાદ મુંબઈના માલવણી વિસ્તારમાં તણાવપૂર્ણ પરિસ્થિતિ સર્જાઈ હતી. બુધવારે મોડી રાત્રે આ વિવાદ વધુ વકર્યો હતો; જોકે, પોલીસના સમયસર હસ્તક્ષેપથી પરિસ્થિતિ કાબૂમાં આવી ગઈ હતી.

ધ્વજ ફરકાવવાને લઈને વિવાદ

માલવણીમાં રામ નવમીની તૈયારીઓ ચાલી રહી હતી, અને સ્થાનિક લોકો સમગ્ર વિસ્તારમાં ભગવા ધ્વજ અને બૅનર લહેરાવી રહ્યા હતા. આ દરમિયાન, એક જૂથ એક મસ્જિદની સામે આવેલા રસ્તા પર ધ્વજ ફરકાવવા માટે પહોંચ્યું, જેના પર મુસ્લિમ સમુદાય દ્વારા વાંધો ઉઠાવવામાં આવ્યો. આ વિરોધ બાદ, બન્ને જૂથો એકબીજા સામે આવી ગયા, અને શાબ્દિક વિવાદ ઝડપથી તણાવપૂર્ણ સ્થિતિમાં પરિણમ્યો. થોડા સમય માટે, વિસ્તારમાં અરાજકતા છવાઈ ગઈ હતી, પરંતુ પોલીસ ઘટનાસ્થળે પહોંચી ગઈ અને પરિસ્થિતિ વધુ બગડે તે પહેલાં તેને કાબૂમાં લેવામાં સફળ રહી. આ ઘટનાનો એક વીડિયો સોશિયલ મીડિયા પર વાયરલ થયો છે, જેમાં મસ્જિદની નજીક એક સાંકડી ગલીમાં મોટી ભીડ એકઠી થયેલી જોવા મળી રહી છે. વીડિયોમાં, ઘણા લોકો ભગવા ધ્વજ પકડીને બેઠા છે, અને બન્ને જૂથો વચ્ચે ઉગ્ર દલીલ થઈ રહી હોય તેવું લાગે છે. વીડિયોમાં મુંબઈ પોલીસના વરિષ્ઠ અધિકારીઓ ભીડને અલગ કરવાનો અને પરિસ્થિતિને નિયંત્રણમાં લાવવાનો પ્રયાસ કરતા દેખાય છે. એક વ્યક્તિ ઉંચા સ્થાને ઊભો રહીને પોલીસ સાથે વાતચીત કરતો જોવા મળે છે, જ્યારે અન્ય લોકો સજાવટ પર લાદવામાં આવેલા નિયંત્રણો અંગે પ્રશ્નો ઉઠાવે છે.

પોલીસ કાર્યવાહી પર પ્રશ્નો

ઘટના પછી, હિન્દુ જૂથના સભ્યોએ આરોપ લગાવ્યો કે પોલીસે તેમની સાથે કઠોર વર્તન કર્યું અને ઘણા લોકોની અટકાયત કરી. તેમણે વધુમાં દાવો કર્યો કે જેઓને અટકાયતમાં લેવામાં આવ્યા હતા તેમની સાથે દુર્વ્યવહાર કરવામાં આવ્યો હતો. જોકે, પછીથી બધાને છોડી દેવામાં આવ્યા. પોલીસનો દાવો છે કે પરિસ્થિતિને નિયંત્રણમાં રાખવા અને કોઈપણ અનિચ્છનીય ઘટનાઓને રોકવા માટે લેવામાં આવેલા પગલાં જરૂરી હતા. ‘સકલ હિન્દુ સમાજ’ દ્વારા આ બાબત અંગે ઔપચારિક ફરિયાદ નોંધાવવામાં આવી છે. સંગઠને આરોપ લગાવ્યો છે કે મુસ્લિમ સમુદાયબ કેટલાક લોકોએ તેમને ડરાવ્યા અને શારીરિક હુમલો કરવાનો પ્રયાસ કર્યો હતો. હાલમાં, બન્ને સમુદાયો એકબીજા પર આરોપ-પ્રત્યારોપ કરી રહ્યા છે, જ્યારે પ્રશાસન સતર્ક છે અને સમગ્ર પરિસ્થિતિ પર નજીકથી નજર રાખી રહ્યું છે.

તણાવ વચ્ચે, ગુરુવારે સાંજે માલવણીમાં રામ નવમી શોભાયાત્રા કાઢવામાં આવશે, જેમાં કિરીટ સોમૈયા પણ ભાગ લે તેવી શક્યતા છે. પ્રશાસને વિસ્તારમાં કડક સુરક્ષા પગલાં અમલમાં મૂક્યા છે, અને વધારાના પોલીસ દળો તૈનાત કરવામાં આવ્યા છે. અધિકારીઓએ જનતાને શાંતિ જાળવવા અને અફવાઓ પર ધ્યાન ન આપવા અપીલ કરી છે. પોલીસે જણાવ્યું છે કે કોઈપણ પ્રકારની અશાંતિ ફેલાવવાનો પ્રયાસ કરનાર સામે કડક કાર્યવાહી કરવામાં આવશે. હાલમાં, વિસ્તારની પરિસ્થિતિ પર સતત નજર રાખવામાં આવી રહી છે.