મહારાષ્ટ્ર ATS દ્વારા આંતરરાષ્ટ્રીય વૉટ્સઍપ ગ્રુપની તપાસ માટે પાંચ સ્થળે સર્ચ-ઑપરેશન

મહારાષ્ટ્રની ઍન્ટિ-ટેરરિસ્ટ સ્ક્વૉડ (ATS) રાજ્યભરમાં પાંચ સ્થળે સર્ચ-ઑપરેશન કરીને એક આંતરરાષ્ટ્રીય વૉટ્સઍપ ગ્રુપની તપાસ કરી રહી છે

પ્રતીકાત્મક તસવીર

મહારાષ્ટ્રની ઍન્ટિ-ટેરરિસ્ટ સ્ક્વૉડ (ATS) રાજ્યભરમાં પાંચ સ્થળે સર્ચ-ઑપરેશન કરીને એક આંતરરાષ્ટ્રીય વૉટ્સઍપ ગ્રુપની તપાસ કરી રહી છે, જેમાં પાકિસ્તાન અને ગલ્ફ દેશોના સભ્યો સામેલ છે. રત્નાગિરિમાં અરબી ભાષાનાં એક શિક્ષિકા, તેમના પતિ અને પુત્રીની પૂછપરછ કરવામાં આવી હતી. જોકે હિઝબુલ મુજાહિદ્દીન સાથેનું સંભવિત જોડાણ હજી સુધી કન્ફર્મ નથી થયું.
સૂત્રોના જણાવ્યા અનુસાર ATS એક આંતરરાષ્ટ્રીય વૉટ્સઍપ ગ્રુપની પ્રવૃત્તિઓની તપાસના ભાગરૂપે રાજ્યભરમાં પાંચ સ્થળે દરોડા પાડી રહી છે. એજન્સી ગ્રુપના સભ્યો, તેમની વાતચીત અને તેમના સંભવિત સંપર્કો વિશે માહિતી મેળવવા માટે લોકોની પૂછપરછ પણ કરી રહી છે. આ ગ્રુપમાં પાકિસ્તાન અને ગલ્ફ દેશો સહિત અનેક દેશોના સભ્યો છે. તપાસકર્તાઓને એવી માહિતી પણ મળી છે કે ગ્રુપમાં ધાર્મિક સંગઠનો સાથે સંકળાયેલા લોકો પણ સામેલ હતા અને એમાં કથિત રીતે ધાર્મિક વિષયો પર ચર્ચા થતી હતી.

ATSએ સોમવારે રત્નાગિરિ જિલ્લાના રાજાપુરમાં રહેતાં અરબી ભાષાનાં એક શિક્ષિકા, તેમના પતિ અને પુત્રીની કલાકો સુધી પૂછપરછ કરી હતી. તપાસના ભાગરૂપે ફૉરેન્સિક તપાસ માટે તેમના મોબાઇલ ફોન જપ્ત કરવામાં આવ્યા હતા. પૂછપરછ બાદ ત્રણેયને મુક્ત કરવામાં આવ્યાં હતાં. એજન્સી વૉટ્સઍપ ગ્રુપ અને પાકિસ્તાનસ્થિત આતંકવાદી સંગઠન હિઝબુલ મુજાહિદ્દીન વચ્ચેના સંભવિત જોડાણની તપાસ કરી રહી છે. જોકે તપાસમાં હજી સુધી આવું કોઈ જોડાણ સ્થાપિત થયું નથી. ATS તપાસના ભાગરૂપે ગ્રુપની મેમ્બરશિપ, ચૅટ અને સંભવિત કૉન્ટૅક્ટ્સની તપાસ ચાલુ રાખી રહી છે. તપાસ આગળ વધવાની સાથે વધુ વિગતો બહાર આવવાની અપેક્ષા છે.