01 April, 2023 06:35 PM IST | Mumbai | Gujarati Mid-day Correspondent
‘બ્રહ્માસ્ત્ર’નો બીજો અને ત્રીજો ભાગ એકસાથે બનાવવામાં આવશે : આયાન મુખરજી
આયાન મુખરજીએ જણાવ્યું છે કે ‘બ્રહ્માસ્ત્ર’નો બીજો અને ત્રીજો ભાગ સાથે-સાથે બનાવવામાં આવશે અને આ વખતે સ્ટોરીઝ પર વધુ ધ્યાન આપવામાં આવશે. ગયા વર્ષે રિલીઝ થયેલી ‘બ્રહ્માસ્ત્ર પાર્ટ 1 શિવા’માં અમિતાભ બચ્ચન, રણબીર કપૂર અને આલિયા ભટ્ટ લીડ રોલમાં હતાં. હવે એના અન્ય બે ભાગ પર કામ ચાલી રહ્યું છે. એ વિશે આયાન મુખરજીએ કહ્યું કે ‘અમે ‘બ્રહ્માસ્ત્ર’નો બીજો અને ત્રીજો ભાગ સાથે-સાથે બનાવવાના છીએ. સાથે જ અમે એની સ્ટોરી લખવામાં થોડો વધારે સમય લઈશું. હું જાણું છું કે એને લઈને ખૂબ અપેક્ષા રાખવામાં આવે છે.
લોકો ફિલ્મના બીજા ભાગની આતુરતાથી રાહ જોઈ રહ્યા છે. જોકે કોઈ પણ પ્રકારના સમાધાન વગર અમે એને સારી રીતે લખીશું. ‘બ્રહ્માસ્ત્ર 2’ને ત્રણ વર્ષ લાગશે.’
‘બ્રહ્માસ્ત્ર પાર્ટ 1 શિવા’ને લઈને આયાને કહ્યું કે ‘અમને ફિલ્મને લઈને મિક્સ રીઍક્શન્સ આવ્યાં હતાં. આમ છતાં ફિલ્મનું કલેક્શન સારું રહ્યું. અનેક લોકોએ અમારી ફિલ્મ સ્વીકારી. સાથે જ સ્ટ્રીમિંગ પ્લૅટફૉર્મ પર પણ સારાં રીઍક્શન મળ્યાં છે. આ કદાચ ૨૦૨૨ની હાઇએસ્ટ-ગ્રોસિંગ ફિલ્મ હતી.’