મહેશ ભટ્ટની ૭૮મી વર્ષગાંઠના ફૅમિલી સેલિબ્રેશનમાં આલિયા ભટ્ટ અને રણબીર કપૂર ગેરહાજર

ફિલ્મમેકર મહેશ ભટ્ટે પરિવાર સાથે ઘરમાં સાદગીભર્યા અંદાજમાં 78મો જન્મદિવસ ઊજવ્યો. સોની રાઝદાન, પૂજા, શાહીન અને રાહુલ ભટ્ટ હાજર રહ્યાં, જ્યારે આલિયા ભટ્ટ, રણબીર કપૂર અને રાહા જોવા મળ્યાં નહોતાં.

મહેશ ભટ્ટ 78મો જન્મદિવસ

આલિયા ભટ્ટના પપ્પા અને ફિલ્મમેકર મહેશ ભટ્ટે રવિવારે પરિવાર સાથે પોતાની ૭૮મી વર્ષગાંઠ ખૂબ જ સાદગીભર્યા અંદાજમાં ઊજવી હતી. ઘરમાં યોજાયેલા આ પ્રાઇવેટ સેલિબ્રેશનની તસવીરો પત્ની સોની રાઝદાન અને પુત્રી પૂજા ભટ્ટે સોશ્યલ મીડિયા પર શૅર કરી હતી અને હવે આ તસવીરો ચર્ચામાં છે. 
જન્મદિવસની ઉજવણીમાં મહેશ ભટ્ટની પત્ની સોની રાઝદાન, દીકરીઓ પૂજા ભટ્ટ અને શાહીન ભટ્ટ અને દીકરો રાહુલ ભટ્ટ હાજર રહ્યાં હતાં. જોકે આ સેલિબ્રેશનમાં આલિયા, રણબીર અને રાહા ક્યાંય જોવા મળ્યાં નહોતાં. આ કારણે ચાહકોએ પણ સોશ્યલ મીડિયા પર તેમની ગેરહાજરી વિશે ચર્ચા શરૂ કરી હતી. જોકે પરિવાર તરફથી તેમના હાજર ન રહેવા અંગે કોઈ સત્તાવાર માહિતી આપવામાં આવી નથી.