05 May, 2026 02:53 PM IST | Mumbai | Gujarati Mid-day Correspondent
હાર્દિક પંડ્યા ગર્લફ્રેન્ડ માહિકા શર્મા સાથે
ભારતીય ક્રિકેટ બોર્ડ ટૂંક સમયમાં ગર્લફ્રેન્ડ કલ્ચર પર કડક નિયમો ઘડવાની તૈયારી કરી રહ્યું છે. વર્તમાન IPL સીઝનમાં મેદાનની બહાર ખેલાડીઓનું ખાનગી જીવન હેડલાઇન્સમાં છે. સ્ટાર ઑલરાઉન્ડર હાર્દિક પંડ્યા, ફાસ્ટ બોલર અર્શદીપ સિંહ અને યુવા બૅટ્સમૅન યશસ્વી જાયસવાલ અને ઈશાન કિશન સહિત અનેક ખેલાડીઓ સાથે ગર્લફ્રેન્ડની હાજરી ચર્ચાનો મુખ્ય વિષય બની ગયો છે.
ઘણા ઓછા જાણીતા ખેલાડીઓ પણ પોતાની ગર્લફ્રેન્ડ સાથે ટ્રાવેલ કરતા જોવા મળી રહ્યા છે. આમાંની ઘણી મહિલાઓ વારંવાર ખેલાડીઓ સાથે ટીમ-બસથી લઈને ટીમ-હોટેલ સુધી દરેક જગ્યાએ જોવા મળે છે. કેટલીક ગર્લફ્રેન્ડ્સને ખેલાડીઓ સાથે હોટેલ-રૂમમાં રહેવાની મંજૂરી ટીમ તરફથી મળી છે. જોકે કેટલીક ગર્લફ્રેન્ડ્સ માત્ર સ્ટેડિયમમાં ખેલાડીઓને મળવા આવે છે.
ભારતીય ક્રિકેટ બોર્ડમાં ચર્ચા છે કે કેટલાક ખેલાડીઓની ગર્લફ્રેન્ડ સોશ્યલ મીડિયા સ્ટાર છે. એમાંથી કેટલાકે સટ્ટાબાજીની વેબસાઇટ્સનું પ્રમોશન પણ કર્યું છે. તાજેતરના સમયમાં IPLના ઘણા ખેલાડીઓ સામે તેમની મહિલા સાથીઓ દ્વારા પોલીસ-ફરિયાદો પણ દાખલ કરવામાં આવી છે.
બોર્ડમાં આતંરિક ચર્ચા થઈ છે કે ‘હોટેલમાં ખેલાડીઓ સાથે પત્નીઓ અને પરિવારના સભ્યો સાથે રહેવામાં કોઈ વાંધો નથી; જોકે આપણે ગર્લફ્રેન્ડ અંગે વધુ ગંભીર વલણ અપનાવવાની જરૂર પડશે. ટીમ કે ટુર્નામેન્ટની આંતરિક વાતો લીક થાય કે મોટી ચૂક થાય એ પહેલાં કડક નિયમો બનાવવા જરૂરી છે.’
