23 May, 2026 09:39 PM IST | Mumbai | Gujarati Mid-day Online Correspondent
કૉકરોચ જનતા પાર્ટીને ‘ઑગી જનતા પાર્ટી’, સોશિયલ મીડિયા પર વાયરલ
સોશિયલ મીડિયા પર છેલ્લા કેટલાક દિવસોથી ‘પાર્ટી’ બનાવવાનો નવો ટ્રેન્ડ જોરશોરથી ચાલી રહ્યો છે. હાલમાં ‘કૉકરોચ જનતા પાર્ટી’ (CJP) સૌથી વધુ ચર્ચામાં છે. પાર્ટી શરૂ થયા પછી થોડા જ દિવસોમાં તેના ફોલોઅર્સની સંખ્યા આશરે 2.15 કરોડ સુધી પહોંચી ગઈ છે, જેના કારણે તેણે અનેક મોટી રાજકીય પાર્ટીઓને પણ સોશિયલ મીડિયા પર પાછળ છોડી દીધી છે. તેના મેનિફેસ્ટો અને વ્યંગાત્મક પોસ્ટ્સને લઈને ઈન્ટરનેટ પર ભારે ચર્ચા થઈ રહી છે. હવે આ વચ્ચે વધુ એક નવી ‘પાર્ટી’ વાયરલ થઈ રહી છે — ‘ઑગી જનતા પાર્ટી’ એટલે કે OJP.
જ્યાં કૉકરોચ જનતા પાર્ટી બેરોજગારી, યુવાનોની નારાજગી અને સિસ્ટમ પર વ્યંગ્ય કરીને વાયરલ થઈ હતી, ત્યાં હવે OJP પોતાને તેની વિરોધી તરીકે રજૂ કરી રહી છે. સમગ્ર ટ્રેન્ડ લોકપ્રિય કાર્ટૂન શો ‘ઑગી એન્ડ ધ કૉકરોચેસ’ પરથી પ્રેરિત હોવાનું માનવામાં આવી રહ્યું છે.
કૉકરોચ જનતા પાર્ટી વાયરલ થયા બાદ થોડા જ સમયમાં ઇન્સ્ટાગ્રામ સહિત અન્ય સોશિયલ મીડિયા પ્લેટફોર્મ્સ પર ‘ઑગી જનતા પાર્ટી’ના પોસ્ટ્સ જોવા મળવા લાગ્યા. આ ગ્રુપનો દાવો છે કે તે CJPના ફાઉન્ડર અભિજીત દીપકે અને તેમના કથિત રાજકીય સંબંધોને એક્સપોઝ કરી રહ્યું છે.
OJP એ સોશિયલ મીડિયા પર અભિજીત દીપકેની જૂની પોસ્ટ શેર કરી, જેમાં તેમણે 2024 દરમિયાન દિલ્હીના ભૂતપૂર્વ નાયબ મુખ્ય પ્રધાન મનીષ સિસોદિયાનો આભાર માન્યો. OJP નો આરોપ છે કે CJP પોતાને તટસ્થ તરીકે રજૂ કરે છે, પરંતુ તેના સંબંધો આમ આદમી પાર્ટી સાથે જોડાયેલા છે.
ઑગી જનતા પાર્ટીની વેબસાઇટ પર લખાયેલ સૂત્ર પણ સોશિયલ મીડિયા પર વાયરલ થઈ રહ્યું છે — “Any roach. Any size. Any species. Dead.” એટલે કે, દરેક પ્રકારના કૉકરોચનો અંત લાવવો તેમનું મિશન છે. સોશિયલ મીડિયા યુઝર્સ તેને મજેદાર પોલિટિકલ સટાયર અને મીમ કલ્ચરનો ભાગ ગણાવી રહ્યા છે.
OJPએ એક પોસ્ટમાં ભારતના સ્વતંત્રતા સેનાનીઓની તસવીરોનું મોન્ટેજ શેર કરીને લખ્યું કે, “જે દેશને તલવાર અને બલિદાનોથી આઝાદી મળી, ત્યાં આજે યુવાનો પોતાને ‘કૉકરોચ’ કહીને ટ્રેન્ડ બનાવી રહ્યા છે.” ગ્રુપે આ મુદ્દાને બેરોજગારી અને યુવાનોની નિરાશા સાથે જોડવાનો પ્રયાસ કર્યો છે.
એક તરફ કૉકરોચ જનતા પાર્ટી બેરોજગારી અને પેપર લીક જેવા મુદ્દાઓ ઉઠાવી રહી છે, ત્યારે બીજી તરફ ઑગી જનતા પાર્ટીનું મેનિફેસ્ટો પણ લોકોનું ધ્યાન ખેંચી રહ્યું છે.
આ વાયરલ ‘પાર્ટી’એ મજેદાર અંદાજમાં 6-પોઇન્ટ એનિમલ વેલફેર મેનિફેસ્ટો જાહેર કર્યું છે. તેમાં રસ્તાના જાનવરો માટે મફત હેલ્થકેર, વધુ શેલ્ટર્સ, રોજિંદું ખવડાવવાની વ્યવસ્થા અને અડોપ્શન કેમ્પેઇન જેવી વાતોનો સમાવેશ કરવામાં આવ્યો છે. પોસ્ટરમાં ઑગીને સફેદ કુર્તા-પાયજામામાં જાનવરો સાથે દર્શાવવામાં આવ્યો છે.
હવે સોશિયલ મીડિયા પર CJP અને OJPના સમર્થકો વચ્ચે મીમ્સ અને પોસ્ટ્સની જંગ શરૂ થઈ ગઈ છે. કેટલાક લોકો તેને માત્ર મજાક અને ઇન્ટરનેટ એન્ટરટેઇનમેન્ટ માને છે, જ્યારે કેટલાક યુઝર્સ તેને રાજકીય એજન્ડા સાથે પણ જોડીને જોઈ રહ્યા છે.
OJP પોતાના બાયોમાં સ્પષ્ટ લખે છે કે તેને કોઈ રાજકીય પાર્ટીનું સમર્થન નથી અને તે કોઈપણ રાજકીય સંગઠન સાથે જોડાયેલી નથી.
હાલ માટે એટલું ચોક્કસ કહી શકાય કે સોશિયલ મીડિયા પરની રાજનીતિ હવે માત્ર ભાષણો અને ચર્ચાઓ સુધી સીમિત રહી નથી. હવે કાર્ટૂન કેરેક્ટર્સ, મીમ્સ અને વાયરલ ટ્રેન્ડ્સ પણ ઈન્ટરનેટની નવી ‘રાજનીતિ’ બની ગયા છે.
