01 September, 2023 08:16 AM IST | Mumbai | Gujarati Mid-day Online Correspondent
પ્રતીકાત્મક તસવીર
મોદી સરકારે વધુ એક મોટી ભેટ આપી છે. પહેલા ઘરેલુ ગેસ સિલિન્ડર (Gas Cylinder Price)ના ભાવમાં ઘટાડો કર્યા બાદ હવે કોમર્શિયલ સિલિન્ડરનો ઉપયોગ કરતા કોમર્શિયલ ગ્રાહકોને મોટી રાહત આપવામાં આવી છે. મોદી સરકારે આજથી 19 કિલોના કોમર્શિયલ સિલિન્ડર (LPG Cylinder Price)ના દરમાં ઘટાડો કર્યો છે. દિલ્હીમાં 157 રૂપિયાના ઘટાડા બાદ કોમર્શિયલ સિલિન્ડર હવે 1522.50 રૂપિયા થઈ ગયો છે. આ દર આજથી એટલે કે 1લી સપ્ટેમ્બરથી લાગુ થશે. દિલ્હીમાં તે 1680 રૂપિયાને બદલે 1522.50 રૂપિયામાં અને કોલકાતામાં તે આજથી 1802.50 રૂપિયાના બદલે 1636 રૂપિયામાં ઉપલબ્ધ થશે. એ જ રીતે, અગાઉ મુંબઈ (Mumbai)માં તેની કિંમત 1640.50 રૂપિયા હતી અને હવે તે ઘટીને 1482 રૂપિયા થઈ ગઈ છે.
નોંધનીય છે કે મંગળવારે રાંધણ ગેસ સિલિન્ડર (LPG)ની કિંમતમાં 200 રૂપિયાનો ઘટાડો કરવામાં આવ્યો હતો. સરકારના આ નવા નિર્ણય બાદ હવે એલપીજી સિલિન્ડર (14.2 કિલો)ના ભાવમાં મોટા ફેરફાર કરવામાં આવ્યા છે. દેશની રાજધાની દિલ્હીમાં હવે 14.2 કિલોના ઘરેલુ એલપીજી સિલિન્ડર 903 રૂપિયામાં વેચાઈ રહ્યા છે. ગ્રાહકોને હવે પહેલા કરતા 200 રૂપિયા સસ્તામાં સિલિન્ડર મળી રહ્યા છે.
ગત મહિને પણ કોમર્શિયલ સિલિન્ડર સસ્તું થયું હતું
ગત મહિને એટલે કે ઓગસ્ટમાં કોમર્શિયલ એલપીજી ગેસ સિલિન્ડરની કિંમતમાં 100 રૂપિયાનો ઘટાડો કરવામાં આવ્યો હતો. આ પછી દિલ્હીમાં આ 19 કિલોના સિલિન્ડરની કિંમત 1,680 રૂપિયા થઈ ગઈ. હવે આ કિંમત ઘટીને રૂ.1522.50 થઈ ગઈ છે. એટલે કે આજથી કોમર્શિયલ ગેસ સિલિન્ડર રૂ. 1522.50માં મળશે.
તાજેતરમાં એલપીજી સિલિન્ડરના ભાવમાં 200 રૂપિયાનો ઘટાડો થયો છે
આ પહેલા તાજેતરમાં જ મોદી સરકારે એલપીજી સિલિન્ડરની કિંમતમાં 200 રૂપિયાનો મોટો ઘટાડો કર્યો છે. આ સાથે મોદી સરકારે 75 લાખ મહિલાઓને ફ્રી ગેસ કનેક્શનની ભેટ પણ આપી છે. આ નિર્ણયથી સામાન્ય લોકોને મોંઘવારીમાંથી મોટી રાહત મળશે. છેલ્લા કેટલાક સમયથી આસમાની મોંઘવારીને કારણે લોકોની મુશ્કેલીમાં વધારો થયો છે. આ પહેલથી લોકોને થોડી રાહત મળશે. તમને જણાવી દઈએ કે રાજસ્થાનની કોંગ્રેસ સરકાર ગરીબોને માત્ર 500 રૂપિયામાં ગેસ સિલિન્ડર આપી રહી છે. બીજી તરફ મધ્યપ્રદેશના મુખ્યમંત્રી શિવરાજ સિંહ ચૌહાણે ઓગસ્ટ મહિનામાં 450 રૂપિયામાં ગેસ સિલિન્ડર આપવાની જાહેરાત કરી છે.