સાન ફ્રાન્સિસ્કો જતી એર ઇન્ડિયા ફ્લાઇટ 8 કલાક હવામાં ફર્યા બાદ દિલ્હી પરત આવી

Air India Flight Return: નવી દિલ્હીથી કેલિફોર્નિયાના સાન ફ્રાન્સિસ્કો જતી એર ઇન્ડિયાની ફ્લાઇટ લગભગ આઠ કલાક સુધી હવામાં ઉડ્યા બાદ દિલ્હી પરત ફરી છે. એરલાઇનના સૂત્રોએ જણાવ્યું હતું કે વિમાનમાં ટેકનિકલ ખામી સર્જાઈ હતી.

પ્રતીકાત્મક તસવીર (સૌજન્ય: મિડ-ડે)

નવી દિલ્હીથી કેલિફોર્નિયાના સાન ફ્રાન્સિસ્કો જતી એર ઇન્ડિયાની ફ્લાઇટ લગભગ આઠ કલાક સુધી હવામાં ઉડ્યા બાદ દિલ્હી પરત ફરી છે. એરલાઇનના સૂત્રોએ જણાવ્યું હતું કે વિમાનમાં ટેકનિકલ ખામી સર્જાઈ હતી. વિમાનમાં 230 મુસાફરો હતા. એરલાઇને એક નિવેદનમાં જણાવ્યું હતું કે વિમાન નવી દિલ્હીના ઇન્દિરા ગાંધી આંતરરાષ્ટ્રીય એરપોર્ટ પર સુરક્ષિત રીતે ઉતર્યું હતું અને બધા મુસાફરો સુરક્ષિત છે.

એર ઇન્ડિયાએ એક નિવેદનમાં જણાવ્યું હતું કે, "ટેકનિકલ ખામીને કારણે 27 મેના રોજ નવી દિલ્હીથી ટેક ઑફ નિર્ધારિત ફ્લાઇટ AI173 સ્થાપિત પ્રક્રિયાઓ અનુસાર દિલ્હી પરત ફરી હતી. વિમાનને સુરક્ષિત રીતે લૅન્ડ કરાયું હતું અને એર ઇન્ડિયાના સલામતી ધોરણો અનુસાર તેનું ટેકનિકલ નિરીક્ષણ કરવામાં આવશે." એરલાઇને ભારપૂર્વક જણાવ્યું હતું કે મુસાફરો અને ક્રૂની સલામતી અને સુખાકારી તેની ટોચની પ્રાથમિકતા છે.

ફ્લાઇટ ફરીથી શેડ્યૂલ કરવામાં આવી રહી છે

એરલાઈને એક નિવેદનમાં વધુમાં જણાવ્યું હતું કે, "મુસાફરોને થયેલી અસુવિધા બદલ અમને દુઃખ છે. અમે શક્ય તેટલી વહેલી તકે તેમના ગંતવ્ય સ્થાન પર પહોંચવા માટે વૈકલ્પિક વ્યવસ્થા કરી રહ્યા છીએ. આ દરમિયાન, અમારી ગ્રાઉન્ડ ટીમો મુસાફરોને જરૂરી તમામ સહાય પૂરી પાડી રહી છે, જેમાં નાસ્તો, હોટેલમાં રહેવાની વ્યવસ્થા અથવા તેમની પસંદગી મુજબ ફ્લાઇટનું સમયપત્રક ફરીથી ગોઠવવાનો સમાવેશ થાય છે."

ગયા અઠવાડિયે, એર ઈન્ડિયાના વિમાનમાં એન્જિનમાં આગ લાગી હતી

ગયા અઠવાડિયે, ગુરુવારે (21 મે) ના રોજ, એર ઈન્ડિયાના વિમાનને એન્જિનમાં આગ લાગવાના કારણે દિલ્હીના ઈન્દિરા ગાંધી આંતરરાષ્ટ્રીય એરપોર્ટ પર સંપૂર્ણ કટોકટી ઉતરાણ કરવાની ફરજ પડી હતી. જોકે, આગ ઝડપથી કાબુમાં આવી ગઈ હતી અને તમામ મુસાફરોને સુરક્ષિત રીતે બહાર કાઢવામાં આવ્યા હતા. ફ્લાઇટ AI2802 બેંગલુરુથી દિલ્હી જઈ રહી હતી. એર ઈન્ડિયાના પ્રવક્તાએ ઘટનાની પુષ્ટિ કરતા જણાવ્યું હતું કે દિલ્હીમાં અંતિમ ઉતરાણ દરમિયાન પાયલોટને એન્જિનમાં આગ લાગવાનો સંકેત મળ્યો હતો. બાદમાં, એવું નક્કી થયું કે એન્જિનમાં ખરેખર આગ લાગી હતી.

તાજેતરમાં, ATF ના ભાવમાં વધારો અને નબળી માગને કારણે, ઍર ઇન્ડિયા અને ઇન્ડિગોએ 1 જૂન, 2026 થી આગામી 90 દિવસ માટે સ્થાનિક ફ્લાઇટ્સ ઘટાડવાનો નિર્ણય લીધો છે. ઍર ઇન્ડિયા લગભગ 15 ટકા અને ઇન્ડિગો 5-7 ટકા સુધી કામગીરી ઘટાડી શકે છે. મુંબઈ, દિલ્હી, હૈદરાબાદ અને બેંગલુરુ સહિત અનેક રૂટ પર અસર પડી શકે છે. ભારતમાં હવાઈ મુસાફરો માટે આગામી મહિનાઓ પડકારજનક હોઈ શકે છે. દેશની બે સૌથી મોટી ઍરલાઇન્સ, ઍર ઇન્ડિયા અને ઇન્ડિગોએ સ્થાનિક ફ્લાઇટ્સ ઘટાડવાનો નિર્ણય લીધો છે. અહેવાલો અનુસાર, બંને ઍરલાઇન્સ 1 જૂન, 2026 થી આગામી 90 દિવસ માટે અનેક સ્થાનિક રૂટ પર ફ્લાઇટ્સની સંખ્યામાં ઘટાડો કરશે. આના મુખ્ય કારણો એવિએશન ટર્બાઇન ફ્યુઅલ (ATF) ના ભાવમાં તીવ્ર વધારો અને ઉનાળાની રજાઓ પછી મુસાફરોની માગમાં ઘટાડો હોવાનું કહેવાય છે.