પાકિસ્તાનમાં રસોઈ બનાવવા માટે ફુગ્ગામાં ભરે છે LGP, તંગીએ જોખમ વહોરવા મજબુર કર્યા

સુરક્ષા વિશ્લેષકોનું કહેવું છે કે ગીચ વસ્તી ધરાવતા વિસ્તારોમાં આ રીતે ગેસનો સંગ્રહ કરવો અત્યંત ખતરનાક છે. થોડી ગરમી અથવા નાનકડો તણખો પણ આ ફુગ્ગાઓમાં ભયાનક વિસ્ફોટ સર્જી શકે છે અને મોટી આગની દુર્ઘટનાને જન્મ આપી શકે છે.

આ ખતરનાક ટ્રેન્ડ ખાસ કરીને કરાચીના ઓરંગી ટાઉન અને મોમિનાબાદ જેવા વિસ્તારોમાં વધુ જોવા મળી રહ્યો છે - તસવીર સોશ્યલ મીડિયા

પાકિસ્તાનના કરાચી શહેરમાંથી ગેસની ભારે અછત વચ્ચે જીવન જોખમાય તેવી હચમચાવી દેતી તસવીરો સામે આવી રહી છે. ગેસ સપ્લાયમાં સતત અછત અને લોડ શેડિંગથી પરેશાન થઈને કરાચીના રહેવાસીઓ હવે પ્લાસ્ટિકના મોટા ફુગ્ગાઓમાં ગેસ ભરીને તેનો સંગ્રહ કરવા મજબૂર બન્યા છે.

મોબાઈલ બોમ્બ જેવું જોખમ

નિષ્ણાતોએ ગેસથી ભરેલા આ પ્લાસ્ટિકના ફુગ્ગાઓને મોબાઈલ બોમ્બ જેવી જોખમી સ્થિતિ ગણાવી છે. સુરક્ષા વિશ્લેષકોનું કહેવું છે કે ગીચ વસ્તી ધરાવતા વિસ્તારોમાં આ રીતે ગેસનો સંગ્રહ કરવો અત્યંત ખતરનાક છે. થોડી ગરમી અથવા નાનકડો તણખો પણ આ ફુગ્ગાઓમાં ભયાનક વિસ્ફોટ સર્જી શકે છે અને મોટી આગની દુર્ઘટનાને જન્મ આપી શકે છે.

જોખમી જુગાડનું કેન્દ્ર ઓરંગી ટાઉન

આ ખતરનાક ટ્રેન્ડ ખાસ કરીને કરાચીના ઓરંગી ટાઉન અને મોમિનાબાદ જેવા વિસ્તારોમાં વધુ જોવા મળી રહ્યો છે. સ્થાનિક બજારોમાં ગેસ ભરવા માટેના આ પ્લાસ્ટિકના ફુગ્ગાઓ સરળતાથી ઉપલબ્ધ છે અને લોકો તેને મોટી સંખ્યામાં ખરીદી રહ્યા છે.

કેવી રીતે કામ કરે છે આ સિસ્ટમ

જ્યારે દિવસ દરમિયાન થોડા કલાકો માટે ગેસ સપ્લાય મળે છે ત્યારે લોકો આ મોટા પ્લાસ્ટિકના ફુગ્ગાઓમાં ગેસ ભરી લે છે. એકવાર ફુગ્ગા ભરાઈ જાય પછી તેને પાઈપથી અલગ કરી દેવામાં આવે છે અને પછી આખા દિવસ દરમિયાન રસોઈ બનાવવા માટે તેનો ઉપયોગ કરવામાં આવે છે. સ્થાનિક લોકો માટે આ વ્યવસ્થા એક પ્રકારનો છેલ્લો વિકલ્પ બની ગઈ છે કારણ કે રોજિંદી જરૂરિયાતો માટે પણ તેમને સંઘર્ષ કરવો પડી રહ્યો છે.

સંકટ પાછળનું કારણ હોર્મુઝ અને વૈશ્વિક તણાવ

કરાચીમાં ગેસની અછત કોઈ નવી સમસ્યા નથી. છેલ્લા ઘણા વર્ષોથી અહીં ગેસ પ્રેશર ઓછું રહેવું અને લાંબા સમય સુધી સપ્લાય બંધ રહેવાની સમસ્યા ચાલુ જ છે. ખાસ કરીને શિયાળામાં સ્થિતિ વધુ વિકટ બની જાય છે કારણ કે તે સમયે ગેસની માંગ વધી જાય છે પરંતુ સપ્લાયમાં વધારો થતો નથી. આ કારણે લોકો રોજિંદી રસોઈ જેવી મૂળભૂત જરૂરિયાતો માટે પણ સંઘર્ષ કરી રહ્યા છે. જ્યાં સુધી આ વૈશ્વિક તણાવનો ઉકેલ નહીં આવે ત્યાં સુધી કરાચી જેવા શહેરોમાં ઉર્જા સંકટ વધુ ઘેરું બનવાની શક્યતા છે અને સામાન્ય લોકો માટે આવી જોખમી પદ્ધતિઓનો સહારો લેવાનો દબાણ વધતું રહેશે. કરાચીમાં ગેસની આ અછત પાછળ આંતરરાષ્ટ્રીય સ્તરે ચાલી રહેલા તણાવને જવાબદાર માનવામાં આવી રહ્યો છે. અમેરિકા અને ઈરાન વચ્ચેના સંઘર્ષના કારણે વૈશ્વિક ઉર્જા સપ્લાય પર અસર પડી છે.

તેલ અને ગેસ માટે અત્યંત મહત્વપૂર્ણ સ્ટ્રેટ ઑફ હોર્મુઝમાં વધતા તણાવને કારણે ઈંધણની અછત વધુ ગંભીર બની છે.સ્થાનિક રહેવાસીઓનું કહેવું છે કે ઘણીવાર દિવસમાં માત્ર એક થી બે કલાક માટે જ ગેસ મળે છે, તે પણ ખૂબ ઓછા પ્રેશર સાથે. આ પરિસ્થિતિમાં લોકો પાસે ગેસ સંગ્રહ કરવાની કોઈ સત્તાવાર વ્યવસ્થા નથી, જેના કારણે તેઓ આ પ્રકારના જોખમી જુગાડનો સહારો લે છે. નિષ્ણાતો એ પણ ચેતવણી આપી રહ્યા છે કે પ્લાસ્ટિકના ફુગ્ગાઓ ગેસ સંગ્રહ માટે બનાવવામાં આવ્યા નથી. તે નબળા હોય છે અને તેમાં ગેસ લીક થવાની સંભાવના વધુ હોય છે. ઘરમાં આવા ફુગ્ગાઓ રાખવાથી આગ અને વિસ્ફોટનું જોખમ ઘણી ગણું વધી જાય છે, ખાસ કરીને જ્યારે આસપાસ વીજળીના ઉપકરણો અથવા ખુલ્લી આગ હોય.