સિદ્ધાર્થ શુક્લાની કાર જેવો નંબર અમેરિકન ફૅનની ગાડી પર

સિદ્ધાર્થની વાત કરીએ તો ૨૦૨૧ની બીજી સપ્ટેમ્બરે ૪૦ વર્ષની વયે તેનું હાર્ટ-અટૅકમાં નિધન થયું હતું

સિદ્ધાર્થ શુક્લા

સિદ્ધાર્થ શુક્લાની વિદાયને ત્રણ વર્ષ થઈ ગયાં છે, પણ ફૅન્સના દિલમાં તેનું સ્થાન હજીયે હલ્યું નથી. આવી જ એક ફૅન છે અમેરિકાની રિતુ, જેણે સિદ્ધાર્થની કારનો જે નંબર હતો એવો જ નંબર પોતાની કાર માટે લીધો છે. સિદ્ધાર્થની વાત કરીએ તો ૨૦૨૧ની બીજી સપ્ટેમ્બરે ૪૦ વર્ષની વયે તેનું હાર્ટ-અટૅકમાં નિધન થયું હતું. તેના અચાનક અવસાનથી સૌકોઈ ચોંકી ગયા હતા. લોકો આજે પણ તેને યાદ કરે છે. હવે તેને શ્રદ્ધાંજલિ અર્પણ કરતાં કૅલિફૉર્નિયામાં રહેતી રિતુ નામની તેની ફૅને સિદ્ધાર્થની કારનો નંબર 1212 પોતાની કાર પર વંચાય એ રીતે SIDI 212 લખેલી નંબર-પ્લેટ બનાવડાવી છે. સિદ્ધાર્થનો તેની કાર સાથેનો ફોટો અને પોતાની કારનો ફોટો સોશ્યલ મીડિયા પ્લૅટફૉર્મ ઍક્સ પર શૅર કરીને રિતુએ લખ્યું છે : લાઇક આઇડલ લાઇક ફૅન. હું સિદ્ધાર્થ શુક્લાને કેટલો પ્રેમ કરું છું એ મારે સાબિત કરવાની જરૂર નથી. હવે હું જ્યાં પણ જઈશ ત્યાં હંમેશાં એને મારી સાથે રાખીશ. તેના પર મને ખૂબ પ્રેમ છે.