ગેંગસ્ટરની સતત ધમકીઓ વચ્ચે સલમાન ખાને લીધી નવી ઇમ્પોર્ટેડ બુલેટપ્રૂફ કાર

સલમાને પોતાના કાફલામાં નિસાન પેટ્રોલ એસયુવીનો ઉમેરો કર્યો છે. હજુ સુધી, આ કાર ભારતીય બજારમાં લોન્ચ કરવામાં આવી નથી

ફાઇલ તસવીર

બૉલીવૂડ સુપરસ્ટાર સલમાન ખાન (Salman Khan)ને એક પછી એક ધમકીઓ મળી રહી છે. તાજેતરમાં જ અભિનેતાને જાનથી મારી નાખવાની ધમકી આપતો ઈમેલ મળ્યો હતો, જે બાદ મુંબઈ પોલીસે (Mumbai Police) અભિનેતાની સુરક્ષા વધારી દીધી હતી. દબંગ ખાને સતત મળી રહેલી ધમકીઓને પગલે મોટો નિર્ણય લીધો છે. તેણે નવું બુલેટપ્રૂફ વાહન ખરીદ્યું છે.

સલમાને લીધી નવી બુલેટપ્રૂફ કાર

સલમાને પોતાના કાફલામાં નિસાન પેટ્રોલ એસયુવીનો ઉમેરો કર્યો છે. હજુ સુધી, આ કાર ભારતીય બજારમાં લોન્ચ કરવામાં આવી નથી. તેમની તરફથી તમામ સુરક્ષાને ધ્યાનમાં રાખીને આ નિર્ણય લેવામાં આવ્યો છે. અભિનેતાએ નિસાન પેટ્રોલ એસયુવી ઇમ્પોર્ટ કરી છે. તેને દક્ષિણ એશિયાના બજારમાં સૌથી લોકપ્રિય અને મોંઘી એસયુવી માનવામાં આવે છે. સુરક્ષાના દૃષ્ટિકોણથી આ બુલેટપ્રૂફ વાહન ખૂબ જ ખાસ છે.

ઉલ્લેખનીયક છે કે 18 માર્ચે સલમાન ખાનને ધમકીભર્યો ઈ-મેલ મળ્યો હતો. આ કેસમાં ગેંગસ્ટર લોરેન્સ બિશ્નોઈનું નામ સામે આવ્યું હતું. પોલીસે લોરેન્સ અને ગોલ્ડી બ્રાર વિરુદ્ધ FIR નોંધી હતી. મેલમાં લખ્યું હતું, “ગોલ્ડી બ્રારને તમારા બોસ એટલે કે સલમાન ખાન સાથે વાત કરવી છે. તમે ઈન્ટરવ્યુ જોયો હશે, જો તમે ના જોયો હોય તો તેને જોવા માટે કહો. જો તમારે મામલો બંધ કરવો હોય તો મામલો થાળે પાડો, જો તમારે રૂબરૂ મળવું હોય તો તે પણ કહો. મેં તમને સમયસર જાણ કરી દીધી છે, આગલી વખતે તમને માત્ર ઝટકો જ જોવા મળશે.”

આ પણ વાંચો: આદિત્ય રોય કપૂરને કઈ વાતનો છે JOMO? જાણો શેનો આનંદ માણી રહ્યો છે અભિનેતા

સલમાને ધમકીઓ પર મૌન તોડ્યું

બુધવારે, સલમાન ખાને પહેલીવાર ગેંગસ્ટરો તરફથી મળી રહેલી ધમકીઓ પર પ્રતિક્રિયા આપી. એક એવૉર્ડ શૉની પ્રેસ કોન્ફરન્સમાં સલમાન ખાનને પૂછવામાં આવ્યું હતું કે, “તમે આખા ભારતના ભાઈજાન છો. તમને મળેલી ધમકીઓ સાથે તમે કેવી રીતે વ્યવહાર કરશો?” દબંગ ખાને આ સવાલનો આવો જવાબ આપ્યો, જેની સોશિયલ મીડિયા પર ખૂબ પ્રશંસા થઈ રહી છે. અભિનેતાએ કહ્યું કે, “અમે આખા ભારતના ભાઈજાન નથી, અમે પણ કોઈની જાન છીએ.”