22 September, 2026 01:37 PM IST | Bengaluru | Gujarati Mid-day Correspondent
AI પોલીસ ફરિયાદ
બૅન્ગલોરના સિદ્ધાર્થ દયલાણી નામના એક CEOએ રોડ-રેજની એક ઘટનામાં પોતાની કાર ડૅમેજ થયા પછી એની ફરિયાદ કરીને કેસ લડવા સુધીનું કામ જેમિનાઇ એટલે કે ગૂગલના આર્ટિફિશ્યલ ઇન્ટેલિજન્સ ચૅટબૉટ પાસે કરાવ્યું હતું. જેમિનાઇએ તેમને ફરિયાદનો ડ્રાફ્ટ બનાવવામાં મદદ કરી. તેમણે ચૅટબોટની મદદથી જ કેસ લડ્યો અને આખરે બાઇકરે માફીનામું લખીને નુકસાનની ભરપાઈ પણ કરી આપી. સિદ્ધાર્થે પોતાનો આ અનુભવ સોશ્યલ મીડિયા પર શૅર કરતાં લખ્યું હતું, ‘થોડા દિવસ પહેલાં બૅન્ગલોરમાં હું રોડ-રેજનો શિકાર થયો. જેમિનાઇએ મને પોલીસમાં ફરિયાદ કરવાનો ડ્રાફ્ટ બનાવવામાં મદદ કરી. જેમિનાઇએ મને પોલીસ પાસેથી એ ફરિયાદ નોંધ્યાની પાવતી મેળવવાનું પણ ભારપૂર્વક કહ્યું હતું. એ મુજબ મેં પોલીસ પાસે આગ્રહ રાખ્યો. એક બાઇકરે ચાલુ કારે જેમતેમ બોલીને મારી કારને કૉર્નર કરીને ઊભી રખાવી અને ગુસ્સામાં સાઇડના દરવાજાને લાત મારી. એ પછી તે બાઇક લઈને કારની આગળ ચલાવવા લાગ્યો અને વારંવાર બ્રેક મારીને ઉશ્કેરતો રહ્યો. જોકે બાઇકરને ખબર નહોતી કે આ આખી ઘટના કારના ડૅશકૅમેરામાં રેકૉર્ડ થઈ રહી છે. એ વિડિયો અને જેમિનાઇની સલાહથી ફરિયાદ કરી. ફુટેજમાં દેખાતા બાઇકના નંબરના આધારે તે બાઇકરની ઓળખ પણ કરી આપી. પોલીસે એ બાઇકરને શોધીને પકડી લીધો અને ક્રિમિનલ કેસની ચેતવણી આપવાથી બાઇકર માફી માગવા અને વળતર ચૂકવવા તૈયાર થઈ ગયો.
